Ekrem Hyseni, kandidati i LDK-së për deputet, ka theksuar se aktiviteti politik i Listës Guxo nuk do të ketë ndikim në votën e qytetarëve të Kosovës.

Sipas Hysenit, raportet e presidentes Vjosa Osmani me partinë në pushtet dhe me Listën Guxo do të kenë një impakt më të madh në zgjedhjet e ardhshme. Ai po ashtu theksoi se votuesit e LDK-së po kthehen pas zhgënjimit nga premisat për ndryshim që nuk u realizuan.

Hyseni e përmendi se LDK ka një ofertë serioze për qytetarët, me individë që nuk kanë ndërtuar karrierën e tyre përmes pozita drejtorësh, por përmes punës dhe angazhimit të vërtetë.

Ai shtoi se, për momentin, kthimi i Vjosës në LDK nuk është një opsion i afërt.

“Aktiviteti politik i Listës Guxo nuk do të ketë ndonjë ndikim në votën e qytetarëve në Kosovë. Raportet e presidentes me Listën Guxo dhe me partinë në pushtet do të kenë impakt. Votuesit e LDK-së po kthehen. Njerëzit nuk hezitojnë të thonë që e kanë votuar Vjosa Osmanin për një ndryshim, por sot po kthehemi në shtëpinë tonë sepse ai ndryshim nuk ka ndodhë”, tha Hyseni.

“Nuk e shoh kthimin e Vjosës si opsion të shpejt. LDK-ja e ka ofertën tek qytetari shumë serioze. Pra, LDK ka njerëz që nuk e kanë ndërtuar jetën e tyre profesionale pas marrjes së një pozite drejtori, apo diçka tjetër”, shtoi ai për Blic Interview me Astrit Gashin.