Deputetja e LDK-së, Doarsa Kica-Xhelili, në një intervistë me Astrit Gashin në BlicInterview, ka folur edhe për deklaratat se qeveria këtë që po e bën në veri, po e bën për sundim të ligjit.
Ajo thotë se derisa e mendon këtë, po i dalin shumë elemente që po e flasin të kundërtën, derisa përmend komunën e Graçanicës, që thotë se në të valon flamuri serb dhe se aty nuk po shtrihet sundimi i ligjit.
“Të them unë që po besoj që po e bëjnë sepse besojmë fuqimisht në shtrirjen e sundimit të ligjit, po më dalin shumë elemente të tjera që po e flasin të kundërtën. Tash nëse unë dua të besoj që si qytetare e këtij vendi, që shërbej edhe si deputete në Kuvend, dua ta mbështes qeverinë në rrugëtimin e shtrirjes së sovranitetit në veri, atëherë mendoj që pyetja që duhet t’i shtrojmë janë shumë të thjeshta: 1. Në komunat tjera, me shumicë serbe, hiç më larg se në Graçanicë ku të valon flamuri serb në qendër të Graçanicës, a ke më pak apo më shumë shtrirje të sundimit të ligjit? Dhe në qoftë se ti mua më thua se patrullat e Policisë së Kosovës shkojnë pa pikën e problemit në atë komunë ku po të valëvitet flamuri serb, që nuk po them megjithatë që unë pajtohem me një nacionalizëm të tillë, ne i valojmë të Shqipërisë, ata i valojnë të Serbisë, kjo është e qartë, por shtrohet pyetja çka është sundimi i ligjit për këta, pra a është simbolikë sundimi i ligjit, sepse me sa kemi parë deri më tash, kur ka ardhur koha te mbrojtja faktike e sovranitetit të pjesës së veriut, ne nuk e kemi bërë vetë, gjithmonë kemi përfunduar duke u mbështetur në aleatët ndërkombëtarë, ndërkaq që përjashtoj simbolikën që thirren për sovranitet, ti ke më shumë sundim të ligjit në komunat që nuk i kanë ato simbolika. Rrjedhimisht, mua nuk më duket më që është çështja e sundimit të ligjit, ose e kanë krijuar një pretekst për ta shërbyer si diskurs narracion që është më lehtë për ta gëlltitur si shoqëri, sepse mendoj se megjithatë ne kemi njëfarë brishtësie kur flasim për njëfarë patriotizmi, nacionalizmi”, vlerëson ajo.
Sipas Kica Xhelilit, e gjitha ka narracion elektoral dhe s’ka tjetër shpjegim, teksa potencon se të gjitha veprimet që nga çështja e targave nuk kanë pasur efekte në veri për shtrirje të sovranitetit e as sundim të ligjit.
“Absolutisht ka edhe narracion elektoral. Nuk ka shpjegim tjetër. Unë nuk dua të shtrihem në diskutimet se çka është patriotizmi. Ne si shoqëri duhet të fillojmë të lirohemi nga emërtimet e tilla, që në njëfarë forme mandej gjithmonë po shërbejnë në identifikimin dhe përçarjen flagrante të shoqërisë tonë, në patriotët dhe jo patriotët. Jo. Po i anashkalojmë këto veç pak. Po e parashtrojmë një pyetje ndryshe dhe tjetër: Çka po mbërrijmë ne me veprimet që po i marrim? Hajde po e lëmë që po e bëjmë për sundim të ligjit, po ku jemi tash, si jemi më mirë për shkak të veprimeve tona. Nëse e merr me analizu në mënyrë sistematike nga çështja e targave deri sot, cila nga veprimet që u ndërmorën në emër të cilitdo qëllim, duke filluar nga targat, sot ty të është fuqizuar, sot e ka arritur impaktin për të cilin është nisur dhe në qoftë se përgjigja që ti e merr është që secili veprim po i arrin dy efekte, ato efekte janë që në veri nuk ke shtrirje të sovranitetit, sepse megjithatë nuk po arrin t’i mbështesësh, t’i ruash as njerëzit e tu atje dhe përgjigja e dytë është që ti le të themi i ke ndryshuar komplet narracionin diplomatik ndërkombëtar për vete, në dëm tëndin, negativisht për ty”, deklaron deputetja e LDK-së.
Ajo përmend se mediat ndërkombëtarë shkruajnë vazhdimisht për përplasje me miqtë ndërkombëtarë, në kohën kur në Serbi ka një opozitë të fuqishme kundër Vuçiçit e vazhdimisht protesta.
“Sot artikuj ndërkombëtarë shkruajnë se si ne po e dërgojmë Kosovën drejt një përplasje me miqtë tanë dhe pyetja që të gjithë po e shtrojnë është se si është e mundur që në kohën kur opozita serbe është kaq e fuqishme kundër Vuçiçit, ku në Serbi ke protesta të hatashme kundër sistemit të tij autokrat, ne e tërheqim vëmendjen në Kosovë. Kujt po i shërbejmë?”
Se a po aludon se qeveria po i ndihmon Vuçiçit në këtë mënyrë, ajo vlerëson se vetëm Kosovës nuk po i ndihmon dhe se duhet parë rezultati që ka vendi dhe jo qëllimi që ka individi.
“Çka unë po aludoj është që veç sundim të ligjit nuk po shtrijmë dhe veç Kosovës nuk po i ndihmojmë. Nuk po them që qëllimi është i tillë por në fund të ditës çka më intereson mua qëllimi thellë brenda një individi në ekzekutiv, kur rezultati po jep diçka krejtësisht ndryshe prej asaj që neve na konvenon si shtet, si qenie demokratike, sepse ne megjithatë jemi produkt i shteteve që kanë dashur demokraci në rajon”, deklaron deputetja.
Ndërsa, lidhur me atë se jemi vendi më demokratik në rajon dhe se bashkësia ndërkombëtare po është kundër nesh, Kica Xhelili thekson se demokratik nuk jemi bërë vet dhe se nuk shkon në të njëjtën fjali që t’i thuash bashkësinë ndërkombëtare se ti edhe po e do, edhe nuk po e do demokracinë për ne.
“Dhe si u bëmë vendi më demokratik në rajon? Vet? T’i thuash bashkësisë ndërkombëtare që ka investuar në ruajtjen e demokracisë tënde dhe që ti nuk po e do demokracinë për ne, është një paradoks oksimoron në vetvete, d.m.th nuk përkojnë këto të dyja në të njëjtën fjali, nuk mundesh. Nuk mundesh në mënyrë selektive t’i thuash ti tash po e do demokracinë, por tash s’po e do demokracinë, nuk mundesh. Tash është shumë lehtë që si parti opozitare, në qoftë se ne do të bënim kalkulimet elektorale, sot do të ishte momenti më i lehtë i përfshirjes në një gjuhë patriotike të thirrjeve të tilla të bëshme patriotike. Arsyeja që pak më parë thash se duhet të shkëputemi nga ndarja e tillë e shoqërisë nuk është se ne po i identifikojmë domosdo si një gjuhë populliste kinse në shërbim të patriotizmit, por sepse narracioni që po ushqehet nga grupacionet e ndryshme edhe në rrjete sociale nuk është aksidentale”, shton tutje ajo për BlicInterview.
Ajo flet edhe për pyetjen që po ua bëjnë se çka po bën LDK për gjithë këtë situatë.
“Pyetja që më parashtrove ti është pyetje që po na parashtrohet shpesh. Ju si LDK çka po bëni? Kur krijohet një klimë specifike dhe nuk e kemi për herë të parë në Kosovë, klimë specifike e një besimi të verbër në një temë, si shoqëri nuk po e shohim për herë të parë si realitet. Si shoqëri kemi pasur momentume të caktuara krejt jetën tonë politike të pasluftës, që kohë pas kohe kanë ditur të krijojnë disa besime të verbra rreth një ideje dhe më pas ajo ide është shkapërderdhur dhe mendoj që nuk duhet të anashkalojmë”.
Ndërsa, se a ishte edhe besimi në Rugovën i tillë, deputetja e LDK-së thotë se nuk mund të jetë i tillë dhe se njerëzit kanë besuar në Rugovën për idealin e tij dhe rezultatin që ka sjellë ai ideal.
“Besimi në Rugovën nuk mund të jetë i tillë. Besimi në individë, në qoftë se del në shoqëri edhe i diskuton me ta e sheh që në fund krejt disi kthehen apo tjetërsohen në një besim të verbër në një individ sepse pastaj ti kur fillon t’i decentralizosh ato mendime, e sheh që pak ka të bëjë në fakt me besimin që veprimet po e prodhojnë rezultatin efektiv, e shumë ka të bëjë nga disa akterë që duan ta besojnë që një individ i caktuar që sot është kryeministër nuk ka shanse që të na dërgojë në rezultate që s’janë të mira për vendin. Pra nuk kemi të bëjmë me besim në ideologji, kemi të bëjmë me besim në individë dhe ai individualitet pastaj po përkthehet në rezultate që janë inekzistente. Ndërkaq, paralelja që ti po e tërheq, nuk ka të bëjë me Rugovën si individ. Besimi nuk ka të bëjë si individ por në idealin që e ka shtruar dhe rezultatin që e ka prodhuar ai ideal. Tash në qoftë se ju analizoni, presidenti i ndjerë gjithmonë është kritikuar për pacifizmin e tij nga disa akterë specifikë edhe asokohe dhe mos të harrojmë që ne në atë kohë nuk kemi qenë duke u përballur me Serbinë jashtë kufirit të Kosovës, por me Serbinë brenda kufirit të Kosovës. Kemi qenë duke u përballur me rriskun për gjenocid përbrenda Kosovës, spastrimin etnik përbrenda Kosovës, megjithatë, ke pasur kritikë të shumtë që e kanë akuzuar për qëndresën e tij pacifiste dhe gjithmonë ka ekzistuar një frikë se ti duke shkuar, duke u takuar me këta akterë në Amerikë, në BE, etj, etj, nuk po bën gjë”, deklaron ajo.
Kica Xhelili shprehet se sot rezultati që është lidhur me miqtë tanë, po na largon nga ta dhe se po shkatërrohet një agjendë afatgjate e miqve tanë, për shkak se ekzekutivi dëshiron ta arrijë një qëllim, duke shkuar në anën e kundërt të tij.
“Por çka ka prodhuar një miqësi e tillë më pas shtrohet pyetja. Nuk po fokusohem te ideali por po fokusohem te rezultati. Rezultati sot po na largon ata miq dhe ajo që mua më krijon si përshtypje sepse në fund të fundit krejt politika për perceptim. Tash shtrohet pyetja: ku jemi sot? Pse jemi më mirë sot? A ndodh që në fakt ne e kemi shkatërruar një agjendë afatgjate të miqve tanë, për të arritur qëllimin që sot po themi si ekzekutiv që duam ta arrijmë, por po shkojmë në të kundërtën e arritjes së atij qëllimi?”, thotë deputetja Doarsa Kica Xhelili./Gazeta Blic/
