Sekretarja e Përgjithshme e Partisë Demokratike të Kosovës (PDK), Vlora Çitaku, ka deklaruar se Lëvizja Vetëvendosje në zgjedhjet e ardhme do të jetë në opozitë.
Ajo u shpreh e bindur se Bedri Hamza do të jetë kryeministër i Kosovës.
“Po e them me siguri të plotë, jo me arrogancë.”, u shpreh ajo raporton Gazeta Blic.
Në lidhje me deklaratën e Çitakut ka ardhur reagimi i menjëhershëm i partisë në pushtet, LVV-së.
Deputeti i pozitës, Agon Batusha, tha se deklarata e Çitakut është thejsht dëshirë dhe për konsum të brendshëm partiak.
“Thjeshte deklarate, deshirë apo fjalë për konsum të brendshem partiak. Asgjë që korrespondon me realitetin” tha Batusha në përgjigjen e tij shkurt për “Gazeta Blic”
Edhe zëdhënësi për media i PDK-së, Faton Abdyllahu, deklaroi për “Gazeta Blic” se oferta e PDK-së me zotin Bedri Hamza si kandidat është serioze dhe se të gjitha të këqijat ky vend që po i merr nga kjo qeveri do të marrin fund me ofertën që e ka bërë PDK-ja.
“Oferta jonë është shumë serioze, oferta e PDK-së për zgjedhjet e ardhshme është e re dhe është përmbajtësore sepse ne ofrojmë ekspertin, politikanin e njohur tashmë, të pakorruptuar, të ngritur profesionalisht zotin Hamza. Kjo është oferta jonë serioze prandaj mendojmë se të gjitha të këqijat ky vend që po i merr nga kjo qeveri do të marrin fund me ofertën që e ka bërë PDK-ja” deklaroi Abdyllahu për “Gazeta Blic”
Sipas sondazhit të fundit të publikuar nga UBO Consulting, Lëvizja Vetëvendosje (LVV) do të printe e para në listë, duke kryesuar me 48.5 %, PDK- 18.2 %, LDK- 17.9 %.
/Gazeta Blic/
Çitaku: Vetëvendosje në zgjedhjet e ardhshme do të jetë në opozitë