Lajme

Njeriu i Kryeministrit Kurti në SHBA i tërheq vërejtjen ambasadorit amerikan që të mos përzihet në punët e brendshme të Kosovës

06/19/2021 18:19
nga:M K

Admir Molla, një shqiptar i cili jeton në New York e me të cilin kryeministri Kurti bisedon për raportet e Qeverisë së Kosovës me Shtetet e Bashkuara të Amerikës, i ka thënë Ambasadorit amerikan, Philip Kosnett, që të mos përzihet në punët e brendshme të Republikës së Kosovës. Kjo pasi Kosnett ka thënë se Kosova ka detyrim të themelojë Asociacionin.

Ambasadori i Shteteve të Bashkuara të Amerikës, Philip Kosnett, ditë më parë ka thënë se SHBA-ja beson që Kosova ka detyrim themelimin e Asociacionit të Komunave me Shumicë Serbe dhe se historia s’ka filluar me krijimin e Qeverisë Kurti. Një deklaratë e tillë e Kosnett ka nxitur reagime të shumta, derisa vetë Kurti në kundërpërgjigje, ka insistuar se Kosova s’mund të themelojë Asociacion njëetnik.

E pas kësaj deklarate ka reaguar edhe Admir Molla, i cili është pjesë e komunitetit shqiptar në Shtetet e Bashkuara të Amerikës, e që nga publikimet në rrjete sociale shihet që ka kontakte dhe afërsi me kryeministrin e Kosovës, Albin Kurtin.

Molla ka udhëzuar Ambasadorin Kosnett që të mos përzihet në punët e brendshme të Kosovës.

“Amerikanë s’jetojnë në Kosovë. Shumica e tyre kurrë s’kanë dëgjuar për Kosovën. Ambasadori i SHBA-së nuk duhet ta përfshijë veten e tij në punët e brendshme të Kosovës. Secili vend ka të drejtë për sovranitetin e vet pavarësisht madhësisë. Franca e ka çliruar Amerikën, por a është SHBA-ja gjithmonë borgjlike? Jo.”, ka shkruar Molla.

Molla thotë se kjo çështje shkon përtej kryeministrit Kurti dhe ambasadorit Kosnett. Ai thotë se në shoqërinë kosovare ndryshe vlerësohesh nëse e ke emrin Andreë dhe ndryshe nëse e ke Admir.

Americans don’t live in Kosovë, most have never even heard of Kosova. The US ambassador should not involve himself in internal affairs. Regardless of size every country has a right to its sovereignty. Also, France liberated the US but is America forever indebted? No.

Kryeministri Kurti më 22 mars të këtij viti ka zhvilluar edhe një takim virtual me Mollën, me të cilin kanë biseduar për rolin që shqiptaro-amerikanët do ta kenë në qeverinë e re dhe për atë se si do të thellohen raportet në mes të Kosovës dhe Shteteve të Bashkuara të Amerikës.

Ndërkohë në shumë postime, Molla nuk e fsheh simpatinë e tij për Albin Kurtin.