Zyra Kombëtare e Auditimit (ZKA) ka nxjerrë një raport kritik për Komunën e Lipjanit, duke theksuar disa dobësi në menaxhimin e prokurimeve dhe kontrollin e tenderëve.
ZKA ka vënë në dukje se gjatë projekteve të ndryshme, përfshirë ndërtimin e infrastrukturës në sallat e sporteve dhe rregullimin e kuzhinës, janë kërkuar materiale të markave të caktuara, duke ndikuar në konkurrencën dhe mundësinë e ofertimit nga operatorë të ndryshëm.
Në projektin për sallat e sporteve në Gllogoc dhe Rufc, është specifikuar përdorimi i pompave “Grundfos” dhe radiatorëve të prodhuar nga “Fabrika e radiatorëve” në Gjilan, ndërsa në projektin për kuzhinën janë kërkuar produkte nga marka “Samsung” dhe “Beko”.
ZKA theksoi se specifikimi i emrit të prodhuesit mund të ndikojë në dëmtimin e konkurrencës dhe të sjellë trajtim të pandershëm për operatorët ekonomikë.
ZKA ka dhënë një opinion të kualifikuar për Komunën e Lipjanit për vitin 2024, për shkak të mangësive të tilla si keqklasifikimi i shpenzimeve dhe dobësi në menaxhimin e të hyrave dhe kontratave.
Komuna ka marrë gjithsej 15 rekomandime, përfshirë disa të përsëritura nga vitet e kaluara, dhe ka zbatuar vetëm pjesërisht disa nga to.
