Jennifer Hermoso ka reaguar për herë të parë publikisht pasi u puth nga presidenti i Federatës Spanjolle të Futbollit, Luis Rubiales, gjatë ceremonisë së dhënies së medaljeve, pas fitimit të Kupës së Botës.

Këtë të premte Rubiales tha se puthja ishte konsensuale dhe se nuk pranonte të dorëhiqet nga posti.

Pas këtyre deklaratave, ka ardhur edhe përgjigja e Hermosos, e cila ka hedhur poshtë çfarë tha Rubiales.

“Dua të sqaroj se në asnjë moment nuk kam dhënë pëlqimin për puthjen që më dha dhe në asnjë rrethanë nuk u përpoqa të lehtësoja presidentin. Nuk do të toleroj të vihet në dyshim fjala ime, aq më pak të shpikin fjalë që nuk i kam thënë” – deklaroi ajo.

Ndërkohë pasi Rubiales deklaroi se nuk do të dorëhiqet, qeveria spanjolle vendosi që ta pezullojë nga posti i presidentit të Federatës Spanjolle të Futbollit.