Gjatë prezantimit të programit gjashtëmujor në krye të BE-së, Presidenti qipriot Nikos Christodoulides tha se zgjerimi është prioritet.
“Familja evropiane është një bashkim shtetesh që angazhohet me botën nga një pozicion force dhe besimi të brendshëm. Zgjerimi qëndron në zemër të kësaj shtylle. Nga Ukraina dhe Moldavia në Ballkanin Perëndimor dhe Turqi, zgjerimi mbetet mjeti më i fuqishëm dhe transformues gjeopolitik i Unionit. Është shumë më tepër sesa thjesht plotësimi i një harte. Bëhet fjalë për plotësimin e një vizioni. Një vizion i një Evrope të ribashkuar, të ankoruar fort në paqe, demokraci, siguri dhe stabilitet. Kjo është pjesë e asaj që e bën zgjerimin kaq të fuqishëm”.
Sipas tij, procesi i zgjerimit duhet përshpejtuar.
“Bashkimi i kontinentit është mbi të gjitha një projekt paqeje, që mundëson siguri dhe stabilitet. Ne nuk mund të përballojmë humbjen e këtij vrulli të ripërtërirë në procesin e zgjerimit. Ne duhet ta bëjmë atë të besueshëm duke dhënë miratimin kur partnerët tanë japin rezultate”.
Për Christodoulides, integrimi evropian nuk do të jetë kurrë i plotë me vendin e tij, Qipron, ishull i ndarë dhe nën pushtim në pjesën veriore.
“Integrimi evropian nuk do të jetë kurrë i plotë me një nga shtetet anëtare të Unionit të ndarë dhe nën pushtim, me qipriotët grekë dhe ata turq të cilëve nuk u lejohet të gëzojnë të njëjtat të drejta themelore që gëzojnë evropianët e tjerë. Dhe ne e dimë shumë mirë se Bashkimi Evropian i ka të gjitha përgjigjet për një zgjidhje të problemit të Qipros”.
Gjatë presidencës qipriote të BE-së, vendi synon të mbyllë kapitujt e parë të negociatave për të arritur finalizimin e tyre të plotë në vitin 2027 dhe anëtarësimin e plotë në vitin 2030.
