Dinamo e Zagrebit ka njoftuar emërimin e legjendës italiane Fabio Cannavaro si trajner të ri.

Ish-mbrojtësi i Real Madridit do të zëvendësojë Nenad Bjelican, i cili është shkarkuar.

Në një deklaratë për ardhjen e Cannavaros, drejtori sportiv i Dinamos, Marko Maric, u shpreh: “Trajneri i ri kultivon stilin e lojës që na nevojitet për rikthimin e dominimit në Kroaci, ai ndërton lojën dhe imponon dominimin.

“Bëhet fjalë për një karizëm të madh që mund të përçojë përvojën e pasur të lojës, por edhe të trajnerit, duke qenë se pas tij ka rezultate në Kinë, ku ishte kampion. Ai është i uritur për sukses dhe për këtë arsye priste sfidën e një klubi që ka ambicie për të fituar tituj.

“Ai e njeh shumë mirë ekipin tonë, si dhe të gjithë HNL. Ai e di se çfarë synimesh pret Dinamo dhe është i vetëdijshëm për situatën në të cilën ndodhet klubi. Detyra kryesore është të kthehet në krye të ligës dhe të vazhdojë me rezultate të mira në Evropë”.

Cannavaro do të marrë drejtimin e skuadrës së Dinamo Zagrebit më 3 janar. Ndeshja e tij e parë do të jetë kundër Arsenalit më 22 janar në Champions League.

/GazetaBlic Sport