Në Barcelonë të gjithë presin shkarkimin e Xavi Hernandezit, vendim që Joan Laporta duhet ta shpallë në ditët ose orët në vijim, me më shumë mundësi të hënën.
Presidenti mbetet i vendosur në synimin e tij për t’i dhënë fund marrëdhënies kontraktuale me trajnerin aktual, dhe, përveç kësaj, tashmë ka rënë dakord me gjermanin Hansi Flick, i cili është në pritje të një telefonate nga Barcelona për të konfirmuar se ai do të pasojë Xavin.
Flick dhe klubi katalanas kanë pasur biseda ditët e fundit që kanë shërbyer për të verifikuar harmoninë e mirë mes të dyve dhe gjithashtu për të konfirmuar se kanë qëndrime të ngjashme në kushtet e kontratës, të cilat ende duhet të miratohen dhe të finalizohen.
Nëse marrëveshja me trajnerin gjerman konfirmohet, Joan Laporta do të përmbushë një nga ëndrrat e tij, pasi që prej kthimit në presidencë emra të tillë si Nagelsmann, Tuchel, Flick, Klopp… kanë qenë gjithmonë në listën e dëshirave të tij, edhe pse, kryesisht për arsye ekonomike, në fund zgjodhi Xavin.
Ish-trajneri i Bayernit është me një këmbë e gjysmë në Barcelonë, por që gjithçka të mbyllet zyrtarisht, duhet të largohet Xavi. Trajneri nga Terrassa u konfirmua një muaj më parë dhe shkarkimi i tij do të kushtonte afërsisht 20 milionë euro.
Ndërkohë, Xavi drejton stërvitjen, i vetëdijshëm se me siguri po përjeton orët e fundit si trajner i Barcelonës.
