Departamenti i Shtetit amerikan ka thënë se bisedimet për përdorimin e dinarit në Kosovë duhet të vazhdojnë me urgjencë.
Këtë koment e bëri zëvendës-zëdhënësi i DASh-it, Vedant Patel, gjatë një konference të sotme për media në Uashington.
Duke u ndalur te takimi i sotëm mes kryenegociatorit të Kosovës, Besnik Bislimi dhe atij të Serbisë, Petar Petkoviq në Bruksel, me ndërmjetësin Miroslav Lajçak, Patel tha se e mirëpresin këtë takim.
“Janë bisedime që i mirëpresim, që po zhvillohen në kuadër të dialogut të lehtësuar nga BE-ja në Bruksel sot, ku po diskutohet për rregulloren për para të gatshme të BQK-së. Këto diskutime duhet të vazhdojnë me urgjencë, dialogu në Bruksel është kanali i duhur për zgjidhjen e këtyre çështjeve, në lidhje me normalizimin e raporteve Kosovë-Serbi”, tha Patel.
Ai përsëriti “brengën” e ShBA-së në lidhje me kufizimin e eksportimit dhe përdorimit të dinarit serb në Kosovë.
Mes tjerash, ai u bëri thirrje edhe një herë Kosovës dhe Serbisë “t’i deeskalojnë tensionet”.
