Stefano Pioli ka arritur rezultate të pabesueshme me Milanin dhe klubi thuhet se është i përgatitur për të aktivizuar klauzolën e zgjatjes së kontratës së tij.

Trajneri 57-vjeçar italian mori drejtimin e kuqezinjve në tetor 2019 pas shkarkimit të Marco Giampaolo dhe ka udhëhequr 152 ndeshje në të gjitha garat që atëherë, përcjell GazetaBlic Sport.

Pioli ka qenë një figurë kyçe në rikthimin e Milanit në majat e futbollit italian dhe i udhëhoqi ata drejt Scudetto-s së tyre të parë pas një dekade duke përfunduar dy pikë përpara rivalëve të qytetit, Inter.

Siç theksohet nga Tuttomercatoweb, kontrata aktuale e Piolit me Milanin skadon në fund të këtij sezoni, por ekziston një klauzolë e zgjatjes njëvjeçare, e cila do të zgjasë marrëveshjen e tij deri në vitin 2024 dhe do të rrisë pak pagën e tij.

Klubi është jashtëzakonisht i kënaqur me punën e tij në stolin e kuqezinjve dhe po përgatitet të aktivizojë klauzolën, duke konfirmuar të ardhmen e tij afatshkurtër në klub.

Pioli e ka bërë të qartë se ai do të ishte i lumtur të kalonte një kohë të gjatë në klub.

/GazetaBlic Sport/