Italia e Gianluigi Donnarumma-s dhe Portugalia e Cristiano Ronaldo-s janë dy nga emrat më të mëdhenj që duhet të kërkojnë rrugën e tyre përmes play-off-it për t’u kualifikuar në Kupën e Botës 2022 në Katar.

Serbia, Spanja, Zvicra, Franca, Belgjika, Danimarka, Kroacia, Anglia dhe Gjermania kanë konfirmuar tashmë pjesëmarrjen e tyre në turne, me grupet kualifikuese D, E dhe G ende për t’u përfunduar, përcjell GazetaBlic Sport.

Kjo do të thotë se Portugalia, Suedia, Italia, Uellsi, Republika Çeke, Skocia, Austria, Rusia, Polonia dhe Maqedonia e Veriut kanë konfirmuar tashmë vendet e tyre përkatëse në playoff, dhe atyre mund t’u bashkohet Finlanda ose Ukraina nga Grupi D, ose Holanda, Turqia ose Norvegjia nga Grupi G.

Skuadrat do të ndahen në dy vazo për shortin e 26 nëntorit, me gjashtë skuadrat e rangut më të lartë nga grupet që do të futen në vazon e parë si skuadrat e para. Italia dhe Portugalia do të jenë ndër skuadrat e renditura, që do të thotë se nuk mund të takohen në fazën gjysmëfinale të play-off-it.