Giorgio Furlani kërkon të sqarojë zërat që po qarkullojnë për të ardhmen e pankinës së Milanit. Pas ndeshjes me Juventusin, që u mbyll pa gola, Drejtori Ekzekutiv i “Djallit” u shpreh:

“Lopetegui? Janë përmendur rreth dhjetë emra e kështu me radhë… Janë thashetheme që janë të bezdisshme. Ne kemi një trajner dhe ai quhet Stefano Pioli.”

Drejtuesi i lartë i kuqezinjve shpjegon se “Leao ka kontratë afatgjatë dhe dëshiron të qëndrojë. Tashmë jemi duke punuar dhe duke planifikuar sezonin e ardhshëm për të forcuar ekipin. Ibrahimovic është thelbësor në vendimet e klubit, ai është një kampion jashtë fushës ashtu siç ishte në fushë. Tifozët janë të pakënaqur sepse janë ambiciozë dhe duan më të mirën siç duam ne.

Së pari, megjithatë, Milani duhet ta mbyllë sezonin në mënyrën më të mirë të mundshme:

“Nuk shkoi ashtu siç shpresonim, sepse ne jemi Milani dhe synimi ynë është të fitojmë, por duam ta përfundojmë sezonin në mënyrën më të mirë të mundshme, duke u mbajtur vendin e dytë.”

Furlani, duke folur më pas për Sky, shtoi: “Puna në merkato do të jetë ndryshe nga ajo e vitit të kaluar kur bëmë revolucion, sepse menduam se kishim një skuadër jo në nivelin e duhur. Këtë herë kemi një bazë”.