Real Madrid ka zyrtarizuar ndarjen e rrugëve me trajnerin e ekipit të parë, Xabi Alonso. Në një komunikatë zyrtare, klubi madrilen bën të ditur se, me marrëveshje të ndërsjellë mes palëve, është vendosur që të përfundojë bashkëpunimi mes Real Madridit dhe teknikut spanjoll.

Sipas njoftimit, vendimi është marrë në mirëkuptim të plotë, ndërsa klubi ka shprehur respekt dhe mirënjohje të veçantë për figurën e Xabi Alonsos, duke e cilësuar atë si një legjendë të Real Madridit dhe një përfaqësues dinjitoz të vlerave të klubit në çdo moment.

“Xabi Alonso do të ketë gjithmonë dashurinë dhe admirimin e gjithë madridistëve, sepse është një legjendë e Real Madridit. Real Madridi do të jetë gjithmonë shtëpia e tij”, thuhet në komunikatën e klubit.

Gjithashtu, Real Madridi ka falënderuar Alonson dhe të gjithë stafin e tij teknik për punën dhe përkushtimin e treguar gjatë kësaj periudhe, duke u uruar suksese në sfidat e reja profesionale dhe personale që i presin në të ardhmen.

Kjo ndarje vjen një ditë pasi Real Madridi u mposht në finalen e Superkupës së Spanjës nga Barcelona.