Dogana e Kosovës ka njoftuar se të premten në pikëkalimin kufitar në Merdar është zbuluar një sasi e konsiderueshme e cigareve elektronike të padeklaruara gjatë tentimit për kontrabandim.

Sipas njoftimit të Doganës autobusi ku janë zënë cigaret elektronike ka arritur të premten nga Gjermania në Kosovë.

Në pyetjen e oficerëve doganorë se a kishte diçka për të deklaruar, thuhet se shoferi është përgjigjur se ka sasi minimale.

“Oficeret Doganore së bashku me Oficerët e Policisë kanë hapur bagazhet, ku janë gjetur sasi prej 17,290 pako cigaret elektronike të shijeve të ndryshme, së bashku me 10,000 thithje (puffs) në sasi prej 20 ml secila, fillimisht në pjesën e majtë të bagazhit. Pas kësaj, autobusi është selektuar për kontroll të vijës së dytë, respektivisht për kontroll detal. Kontrolli ka rezultuar me gjetjen edhe të një sasie të konsiderueshme të cigareve elektronike në fund të autobusit dhe nën karrige të mbuluara me valixhe dhe gjësende të udhëtarëve. Drejtuesi i autobusit ka pranuar verbalisht se malli i takon atij. Tërë sasia është konfiskuar derisa veprimet në lidhje me këtë rast do të vazhdojnë në përputhje me procedurat dhe rregulloret relevante të doganës?”, thuhet në njoftimin e Doganës.