Futbollisti i Hertha Berlin, Aymen Barkok u sulmua fizikisht gjatë mesnatës nga e shtuna në të dielë në një bar në Berlin.

Mesfushori i Hertha Berlin u dërgua me urgjencë në spital pasi pësoi lëndime në fytyrë në kryeqytetin gjerman. Klubi konfirmoi lajmin të hënën teksa zbuloi se operacioni i lojtarit maroken kishte qenë i suksesshëm dhe pranoi se ai nuk do të ishte i disponueshëm për të luajtur.

Barkok ishte në stol për barazimin e Herthës kundër Hannover 96 të premten në mbrëmje. Ai tani duket se do të humbasë pjesën e mbetur të sezonit.

Në deklaratën e klubit thuhej: “Ne ishim të tmerruar kur mësuam dje se Aymen Barkok u sulmua fizikisht në një bar të Berlinit gjatë natës nga e shtuna në të diel dhe duhej të dërgohej në spital me lëndime në fytyrë.

“Aymen ka pasur një operacion të suksesshëm dje, të dielën, por nuk do të jetë në dispozicion për ne për momentin. Të urojmë shërim të shpejtë, Aymen! Ne po mendojmë për ty.”

/GazetaBlic Sport