Trajneri i Barcelonës, Xavi zbulon se lojtarët e tij do të mblidhen për të parë Inter-Viktoria Plzen nesër para ndeshjes së tyre në shtëpi kundër Bayern Munichut.

“Nerazzurrët” e kanë fatin në duart e tyre, duke qenë se një fitore në ‘San Siro’ kundër Viktorias nesër do t’i lejojë ata të kualifikohen në raundin e 16-të të Ligës së Kampionëve me një lojë të lirë, përcjell GazetaBlic Sport.

Djemtë e Simone Inzaghit do të dalin në fushë në orën 18:45, ndërsa Barcelona do të përballet me Bayern Munich në ‘Camp Nou’ në orën 21:00.

Xavi zbuloi gjatë konferencës së tij për shtyp para ndeshjes se lojtarët do të shikojnë së bashku ndeshjen e Interit përpara se të dalin në fushë kundër bavarezëve.

“Ne do ta shikojmë ndeshjen së bashku në dhomën e zhveshjes”, u tha Xavi gazetarëve, cituar nga Mundo Deportivo.

“Objektivi i së nesërmes është të luajmë një lojë të mirë pavarësisht rezultatit të Interit. Duhet të dëshmojmë se mund të konkurrojmë me kundërshtarë të fortë”, përfundoi ai.

/GazetaBlic Sport/