Presidentja e vendit, Vjosa Osmani ka përshëndetur diplomimin e kadetëve kosovarë në Akademinë Ushtarake Mbretërore Sandhurst në Britani.

Përmes një postimi në rrjetin social “Facebook” tha se emri i Republikës së Kosovës u lartësua edhe më shumë përcjell GazetaBlic.

Tutje, shtoi se të rinjtë e të rejat e vendit janë premtimi ynë më i madh për një të ardhme të sigurt.

DITË KRENARIE SOT!
Sot, dy kadetë oficerë të Republikës së Kosovës, Kadet Ilirianë Bunjaku dhe Kadet Ardit Deliu diplomuan nga Akademia Ushtarake Mbretërore Sandhurst në Britani, njëra prej akademive ushtarake më prestigjioze në botë.
Sot, Nëntoger Ilirianë Bunjaku u nderua me nderin më të lartë, me çmimin “Shpata Internacionale”, që jepet për kadetin më të mirë ndërkombëtar.
Kjo është dëshmi e përformancës së saj superiore në të gjitha fushat, përsfshirë rezultatet akademike, shkathtësitë ushtarake, shkathësitë në lidership, përgatitje fizike, etj.
Sot, emri i Republikës sonë u lartësua edhe më shumë. Këta vajza dhe djem po i dëshmojnë të gjithë botës që puna, zelli e përkushtimi shpërblehen gjithmonë. Këta të rinj po na e zbardhin fytyrën e po e ngrisin shtetin tonë në piedestal.
Vajzat e djemtë e Forcës tashmë janë të dëshmuar në çdo cep ku shkel këmba e tyre. Ata janë premtimi ynë më i madh për një të ardhme të sigurt. Ata janë një nga shembujt më të mirë, të cilët duhen ndjekur për të kuptuar që në jetë mundi e puna vlerësohen e shpërblehen gjithmonë.
Urime Kadet Bunjaku dhe Kadet Deliu – në rrugëtimin tuaj ushtarak, qofshi gjithmonë faqebardhë!

LEXO EDHE:

7 viktima, 702 të shëruar dhe 684 raste të reja me koronavirus në vendin tonë në 24 orët e fundit

/GazetaBlic/