Pavarësisht se pretendon se e do Real Madridin dhe i pëlqen të luajë për ekipin, Vinícius Júnior po shqyrton seriozisht një ofertë që nuk mund ta refuzojë nga Arabia Saudite.

Sipas “Radio Marca”, lojtari ka qenë i pranishëm në një takim me përfaqësues të lartë të familjes mbretërore saudite. Oferta që i është bërë sulmuesit është një pagë prej një miliardë eurosh për pesë sezone, pra 200 milionë euro në vit.

Takimi në fjalë u zhvillua online dhe në të morën pjesë figura të rëndësishme të rrethit të ngushtë të sulmuesit dhe përfaqësues të tij. Për afërsisht 15 minuta, Vinícius-it iu prezantuan planet për një bashkëpunim të ardhshëm. Përveç marrëveshjeve të favorshme tregtare, arabët i ofruan atij edhe mundësinë për të qenë ambasador për Kupën e Botës 2034, e cila do të organizohet nga Arabia Saudite.

Takimi e shqetësoi Real Madridin, veçanërisht sepse Vinícius Júnior ka një kontratë deri në vitin 2027, dhe klauzola e tij e lirimit është një miliard euro.

Në një fazë të mëvonshme – në Pragë – pati një takim tjetër ku u diskutuan parametrat financiarë. Aty agjentët e ndërkombëtarit brazilian u takuan personalisht me zëvendëspresidentin e Ligës Saudite, Saad Al-Lazeez.

Nuk dihet me siguri se cilit klub do t’i bashkohej Vini Jr nëse do t’i dorëzohej tundimit të milionave sauditë.

/GazetaBlic Sport/