Ultrasit e Milanit njoftuan se do të futeshin në stadium në minutën e 15-të kundër Lazios në shenjë proteste.

Kuqezinjtë u eliminuan nga Feyenoord në play-off të Ligës së Kampionëve dhe aktualisht janë jashtë vendeve kualifikuese të Champions League në Serie A. Ata janë në vendin e 8-të në renditje, tetë pikë prapa Juventusit të vendit të katërt.

“Është vetëm fillimi i marsit dhe sezoni ynë është pothuajse në kapitullin e tij të fundit. Dy ndeshje derbi në Kupën e Italisë janë shansi juaj i fundit për të rifituar një pikë dinjiteti ose për të konfirmuar dështimin tuaj të plotë,” shkruajnë ultrasit e Milanit nga Curva Sud në një deklaratë të shtunën, cituar nga Milannews.

“Nëse nuk shohim ndryshime të rëndësishme në performancë dhe, mbi të gjitha, në sjellje, do t’ju braktisim plotësisht, duke ju lënë vetëm me turpin tuaj. Një rivendosje e thellë në nivel klubi do të jetë e nevojshme në fund të sezonit”, thuhet gjithashtu në deklaratën e tyre.

/GazetaBlic Sport/