Ushtria ukrainase tha se forcat e saj ndaluan një përparim rus jashtë Avdiivka, një qytet lindor në Ukrainë i pushtuar nga Rusia muajin e kaluar.

Megjithëse forcat e Vladimir Putin morën nën kontroll dy fshatra të tjerë, përparimi i tyre pranë Avdiivka u ndal për momentin, tha zëdhënësi ushtarak ukrainas Dmytro Lykhoviy, shkruajnë mediat e huaja.

“Ne po themi se në këtë sektor të sulmit të drejtpërdrejtë rus, ne po arrijmë të stabilizojmë situatën dhe përparimi i armikut është ndalur”, citohet të ketë thënë zëdhënësi, duke folur në televizionin kombëtar.

“ Armiku po bën përpjekje të jashtëzakonshme, por nuk po bën asnjë përparim”, ka thënë më tej zyrtari.

Ai tha se ushtria ukrainase po bënte punën e saj dhe “duke i shkaktuar humbje të konsiderueshme armikut”.

Pasi luftoi një betejë të gjatë për më shumë se një vit për qytetet ukrainase Bakhmut dhe Avdiivka, Rusia tani po forcon ofensivën e saj për të marrë fshatin Novomykhailivka pranë Marinka.

Fshati tani është një nga zonat më të nxehta në vijën e frontit të luftës, tha zyrtari.

Ndërsa sipas institutit me bazë në SHBA, Instituti për Studimin e Luftës, që monitoron ofensivën, ” blogerët ushtarakë rusë pohuan se forcat ukrainase mbajnë pozicione vetëm në Novomykhailivka perëndimore dhe se luftimet vazhdojnë në zonë”.