Kancelari gjerman Friedrich Merz tha se drafti i fundit i planit të paqes për Ukrainën i është paraqitur Presidentit të SHBA-së Donald Trump – duke përfshirë një propozim mbi lëshimet territoriale që Kievi mund të jetë i përgatitur të bëjë, ka raportuar BBC.

Por Merz theksoi se çështja territoriale ishte “një pyetje që duhet t’i përgjigjet kryesisht presidenti ukrainas dhe populli ukrainas”.

“Ne gjithashtu ia bëmë të qartë këtë Presidentit Trump”, theksoi Merz.

Në javët e fundit, udhëheqësit evropianë kanë punuar ngushtë me Ukrainën për të dalë me një version të ri të një plani paqeje që adreson interesat dhe shqetësimet e Kievit.

Trump duket se është frustruar me ndërlikimet e çështjes së sovranitetit mbi territoret ukrainase të pushtuara nga Rusia.

Meqenëse ekipi i tij negociator ka punuar më parë ngushtë me Moskën, aleatët evropianë të Kievit kanë frikë se presidenti i SHBA-së mund të kërkojë përfundimisht të imponojë një zgjidhje të udhëhequr nga Rusia në Ukrainë.

“Do të ishte një gabim ta detyronim presidentin ukrainas të hyjë në një paqe që populli i tij nuk do ta pranojë pas katër vitesh vuajtjesh dhe vdekjesh”, tha Merz në një konferencë të përbashkët për shtyp me shefin e NATO-s Mark Rutte.

Ai shtoi se në telefonatën “konstruktive” të së mërkurës me Trumpin, ai, Emmanuel Macron i Francës dhe kryeministri i Mbretërisë së Bashkuar, Sir Keir Starmer, e kishin “bërë të qartë” se evropianëve u duhej që edhe interesat e tyre të dëgjoheshin.

Nga ana e tij, Trump tha se pjesëmarrësit kishin “diskutuar Ukrainën me fjalë mjaft të forta” dhe shtoi se ende nuk kishte vendosur nëse do të merrte pjesë në një takim në Evropë. “Nuk duam të humbasim kohë”, tha ai.