Olivier Giroud pranon se ai mund të transferohet në MLS gjatë verës, por refuzon të përjashtojë mundësinë e vazhdimit me Milanin.

Sulmuesi francez me përvojë ka publikuar një intervistë për La Gazzetta dello Sport, ku ndër të tjera ka folur edhe për të ardhmen e tij në klub, përcjell GazetaBlic Sport.

Marrëveshja e tij me Milanin përfundon këtë qershor.

“E di që jam i lumtur te Milani dhe se kemi bërë gjëra të mëdha, por nuk e di se çfarë do të ndodhë me të ardhmen time”, tha Giroud.

“Është një histori e madhe dashurie. Klubi dhe unë nuk kemi diskutuar ende një zgjatje, do të shohim dhe do të vendosim më vonë. Gjëja më e rëndësishme është të qëndrojmë të fokusuar në objektivat e ekipit.

“MLS? Ka edhe vende të tjera. Do të ketë më shumë mundësi në fund të sezonit dhe unë do të vendos. Si baba dhe si futbollist.”

Giroud nuk dukej i shqetësuar për transferimin e ndonjë sulmuesi të ri tek Milan.

“Nuk do të ishte problem, nuk kam frikë nga konkurrenca. Më ka motivuar gjithmonë të bëj më shumë.”

/GazetaBlic Sport/