Donald Trump nuk përjashton mundësinë e hapjes së një hetimi ndaj Joe Biden. Në intervistën e parë si president i SHBA-së në Fox News, Trump deklaroi se ish-presidenti Joe Biden, gaboi që nuk fali veten para se të largohej nga detyra.
“Ky i fali të gjithëve. Dhe gjëja më qesharake, ndoshta e trishtueshme, është se ai nuk fali veten. Dhe nëse e shikoni, gjithçka kishte të bënte me të”, u përgjigj Trump, teksa u pyet nga gazetari Sean Hannity, nëse ai synon t’i kërkojë Kongresit, ose Departamentit të Drejtësisë të hetojë” paraardhësin e tij, shkruan A2 CNN.
Trump nuk specifikoi se çfarë shkeljesh mund të ketë kryer ish-presidenti, vetëm se paraardhësi i tij duhet të durojë llojin e kontrollit ligjor që ai duroi përpara se të rizgjidhej.
“Kam kaluar katër vite ferr. Kam shpenzuar miliona dollarë tarifa ligjore dhe kam fituar. Por unë e bëra atë në mënyrën e vështirë”.
Kur u pyet nga Hannity se atij iu dha mundësia për të falur veten në vitin 2021 kur ai po largohej nga Shtëpia e Bardhë, Trump u përgjigj se nuk pranoi, sepse besonte që nuk kishte bërë asgjë të keqe, raporton A2 CNN.
Në një pikë tjetër të bisedës, Trump kujtoi se mund të kishte hetuar Hillary Clinton, por vendosi të mos e bënte këtë.
“Unë kam qenë gjithmonë kundër hetimeve ndaj presidentëve, ose në rastin e Hillary Clinton, për shembull. Mund ta kisha bërë, por nuk doja”, tha ai.
