Presidenti i SHBA-së, Donald Trump, mund të shtojë edhe 11 vende të tjera në listën tashmë të gjatë të vendeve nën ndalimin amerikan të udhëtimit, përpara Kupës së Botës 2026.
Kupa e Botës 2026, e cila do të mbahet së bashku nga Shtetet e Bashkuara, Meksika dhe Kanadaja, po afrohet me shpejtësi, pas shortit të fazës së grupeve që u zhvillua më 5 dhjetor në Kennedy Centre në Washington D.C.
Në ceremoninë e shortit ishin të pranishëm emra të njohur si Robbie Williams, Kevin Hart, Heidi Klum, Nicole Scherzinger, Shaquille O’Neal, Tom Brady, Wayne Gretzky dhe Village People, si dhe Trump, i cili mori Çmimin Inaugurues të Paqes nga FIFA, të dorëzuar nga Gianni Infantino.
FIFA e nderoi 79-vjeçarin për “përpjekjet e palodhshme për promovimin e paqes”, duke vlerësuar rolin e tij “vendimtar në vendosjen e armëpushimit dhe promovimin e paqes midis Izraelit dhe Palestinës”, si dhe për përpjekjet për të zgjidhur konflikte të tjera në botë.
Trump ka pasur ndikim në turne edhe përpara fillimit të tij, duke shkaktuar vështirësi për tifozët e disa vendeve për shkak të ndalimeve të udhëtimit. Në qershor 2025, ai njoftoi kufizime “për të mbrojtur amerikanët nga aktorët e huaj të rrezikshëm”.
Ai konfirmoi se shtetasit e 19 vendeve nuk lejohen më të hyjnë në SHBA, duke përfshirë Haiti dhe Iranin, të cilët që nga ajo kohë janë kualifikuar për Kupën e Botës 2026.
Shtetasit e Afganistanit, Burmasë, Burundit, Çadit, Kubës, Guineas Ekuatoriale, Eritresë, Laos, Libisë, Republikës së Kongos, Sierra Leones, Somalisë, Sudanit, Togos, Turkmenistanit, Venezuelës dhe Jemenit tashmë përballen me kufizime udhëtimi.
Sipas sekretares së Departamentit të Sigurisë Kombëtare (DHS), Kristi Noem, SHBA ka planifikuar të zgjasë listën e vendeve në 30, duke shtuar edhe 11 shtete të tjera.
Noem tha në një intervistë për FOX News më 4 dhjetor: ‘Nuk do të jem specifik për numrin, por është mbi 30. Dhe presidenti vazhdon të vlerësojë vendet. Nëse një vend nuk ka qeveri stabile, nuk mund të na tregojë kush janë individët dhe të na ndihmojë t’i kontrollojmë, pse duhet të lejojmë njerëzit nga ai vend të vijnë në SHBA?’”
Nuk është e qartë se cilat vende do të përfshihen në kufizime, megjithëse disa përjashtime do të bëhen për lojtarët, stafin dhe familjet që do të marrin pjesë në Kupën e Botës. Sipas POLITICO, tifozët haitianë nuk do të përfitojnë përjashtim, për shkak të krizës politike, dhunës së bandave dhe kushteve të këqija humanitare në vend, që kanë detyruar ekipin kombëtar të luajë ndeshjet e tij në Curacao, 500 milje larg shtëpisë.
Kjo ndodh pas njoftimit të 2 dhjetorit, kur Trump deklaroi se administrata e tij po ndalon përkohësisht aplikimet për imigracion nga 19 vendet që kishte ndaluar më parë gjatë vitit.
