Policia e Kosovës ka raportuar tri raste të ndara që lidhen me armëmbajtje pa leje dhe përdorim të armës, të ndodhura më 21 dhjetor 2025 në Obiliq, Prishtinë dhe Podujevë.

Rasti i parë është regjistruar në Obiliq rreth orës 03:40, ku është arrestuar një mashkull kosovar pasi gjatë kontrollit policor tek ai është gjetur dhe konfiskuar një pistoletë me 11 fishekë. Pas intervistimit dhe me vendim të prokurorit, i dyshuari është liruar në procedurë të rregullt.

Rasti i dytë ka ndodhur në Prishtinë rreth orës 18:18, ku pas një mosmarrëveshjeje tre meshkuj kosovarë janë përfshirë në një rrahje. Gjatë intervenimit policor, nga njëri prej të dyshuarve është sekuestruar një pistoletë. Dy nga të përfshirët kanë pësuar lëndime të lehta trupore dhe kanë pranuar trajtim mjekësor. Me vendim të prokurorit, rasti po procedohet në gjendje të lirë.

Rasti i tretë është raportuar në Podujevë rreth orës 16:39, ku një mashkull kosovar është arrestuar nën dyshimin se kishte shtënë me armë gjatë një ahengu familjar. Nga i dyshuari është sekuestruar një pistoletë me gas. Pas inicimit të rastit dhe me vendim të prokurorit, i dyshuari është liruar në procedurë të rregullt.

Policia ka bërë të ditur se hetimet për të gjitha rastet po vazhdojnë.