Tajvani do të nisë një program kredie prej një miliard dollarësh për të ndihmuar në financimin e projekteve të përbashkëta midis kompanive lituaneze dhe atyre tajvaneze në gjashtë kategori biznesi, tha të martën një ministër i Qeverisë së Tajvanit.
Lituania është nën presionin e Kinës, e cila pretendon se Tajvani, i udhëhequr në mënyrë demokratike, është territor i saj, për të anuluar vendimin e vitit të kaluar për të lejuar ishullin të hapë një ambasadë de-fakto në Vilnius me emrin Tajvan.
Kina ka shkëputur marrëdhëniet diplomatike me Vilnius dhe po ushtron presion ndaj kompanive, si ndaj gjigandit gjerman të pjesëve të makinave, “Continental”, (CONG.DE) që të ndalojnë përdorimin e komponentëve të prodhuar nga Lituania. Ajo gjithashtu ka bllokuar mallin lituanez të hyjë në Kinë.
“Përpjekjet e autoriteteve të Tajvanit për të përdorur ‘diplomacinë e dollarit’ për të zgjeruar aktivitetet e pavarësisë së Tajvanit janë të destinuara të dështojnë,” tha zëdhënësi i ministrisë së Jashtme kineze, Wang Wenbin, në një konferencë për media të mërkurën në përgjigje të një pyetjeje në lidhje me programin e kreditit.
Tajvani, javën e kaluar njoftoi planet për të krijuar një fond të veçantë prej 200 milionë dollarësh për të investuar në industritë lituaneze dhe për të nxitur tregtinë dypalëshe, ndërsa përpiqet të shmangë presionin diplomatik të Kinës ndaj shtetit baltik.
“Fondet e investimeve dhe të kredive do të na ndihmojnë të forcojmë bashkëpunimin,” tha ministri i Këshillit Kombëtar të Zhvillimit të Tajvanit, Kung Ming-hsin, në një konferencë për shtyp.
Fondi i kredisë do të fokusohet në zhvillimin e gjysmëpërçuesve dhe në lehtësimin e zhvillimit të gjysmëpërçuesve, si dhe të bioteknologjisë, satelitëve, financave dhe kërkimit shkencor, tha Kung.
Ministrja e Ekonomisë dhe Inovacionit të Lituanisë, Ausrine Armonaite, tha se vendi i saj planifikoi të hapte një zyrë përfaqësimi tregtar në Tajvan në pranverë.
Diplomatët amerikanë kanë shprehur mbështetje të fortë për Lituaninë, duke e quajtur presionin e Kinës si “shtrëngim ekonomik”.
Ministri i Jashtëm i Lituanisë tha të premten se do të diskutojë për presionin kinez me homologët e tij të Bashkimit Evropian.
https://www.reuters.com/world/asia-pacific/taiwan-launch-1-bln-lithuania-credit-fund-amid-beijing-pressure-2022-01-11/?utm_campaign=trueAnthem%3A%20Trending%20Content&utm_medium=trueAnthem&utm_source=facebook&fbclid=IwAR3SjZ258gPaPmURgp86Xa7lNGaPh8yU3W0SkrK76ANUjIZGx6F73hFQ3h8
