Një familje prej tre anëtarësh u vra pasi dronët rusë goditën një ndërtesë banimi në qytetin ukrainas Zaporizhzhia vonë të premten mbrëma, sipas mediave lokale.
Guvernatori i rajonit Ivan Fedorov tha se sulmi vrau një vajzë 17-vjeçare dhe babain e saj. Mësohet se nëna e vajzës u dërgua në spital, por më vonë vdiq nga plagët e marra.
14 persona të tjerë u plagosën në sulm, duke vuajtur nga djegie dhe lëndime të tjera nga shpërthimi.
Sipas raporteve të mediave lokale, bombardimet dëmtuan të paktën 24 ndërtesa të larta dhe mbi 20 shtëpi.
Një objekt banimi privat u shkatërrua plotësisht, ndërsa dy objekte të tjera banimi së bashku me një kopsht fëmijësh dhe makina aty pranë u shkatërruan.
Zyrtarët lokalë thanë se dy persona të tjerë u vranë në sulmet ruse në rajonin e Donetsk dhe një tjetër në rajonin Kherson.
Ndërkohë, përtej kufirit, një ndërtesë apartamentesh në qytetin jugor të Rusisë, Rostov-on-Don, u godit nga një dron ukrainas gjatë natës të së shtunës.
Zyrtarët rusë thanë se dy persona u plagosën dhe pati dëme në gjashtë apartamente dhe në pjesën e jashtme të ndërtesës.
Sipas Ministrisë së Mbrojtjes në Moskë, 47 dronë ukrainas u rrëzuan mbi territorin rus gjatë natës.
Sulmet vijnë pasi Ukraina dhe Rusia ranë dakord në parim të mërkurën për një armëpushim të kufizuar pasi Presidenti i SHBA Donald Trump foli me udhëheqësit e vendeve këtë javë.
