Autoritetet gjermane kanë deklaruar se sulmi me thikë i së premtes në qytetin jugperëndimor të Mannheimit kishte motive islamike.

Gjatë këtij sulmi, një polic u plagos rëndë dhe ndërroi jetë të hënën.

Ministri i Drejtësisë, Marco Buschmann, ka shkruar në platformën sociale X, se “ka indikacione të qarta të një motivi islamist” pas këtij sulmi.

Ai ka shtuar se prokurorët federalë, të cilët merren me çështjet e terrorizmit dhe sigurisë kombëtare, janë duke kryer hetimet e mëtejme.

“Islami i përket Gjermanisë, por islamizmi jo. Është fanatizëm vdekjeprurës. Tani ka indikacione të qarta për një motiv islamik për krimin në Mannheim. Prandaj, Prokuroria e Përgjithshme Federale tani po merr përsipër hetimet,” ka shkruar Buschmann në X.

Zyra e Prokurorit Federal ka konfirmuar të martën se ka marrë përsipër rastin, duke theksuar rëndësinë e tij dhe duke deklaruar se i dyshuari ishte i motivuar nga feja.

Sipas hetuesve, sulmuesi është një 25-vjeçar nga Afganistani, i cili ka jetuar në Gjermani që nga viti 2004.

Është mësuar se atij i ishte refuzuar aplikimi për azil.

Sulmi u drejtua ndaj disa anëtarëve të një grupi që paraqesin veten si kundërshtarë të “islamit politik”.