Eksperti francez për Rusinë, Laurent Vinatier, i cili ishte në burg në Rusi që nga qershori i vitit 2024, u lirua në një shkëmbim të burgosurish me basketbollistin rus Daniil Kasatkin, i cili ishte i ndaluar në Francë, njoftoi sot Shërbimi Federal i Sigurisë Ruse (FSB).
Siç u tha, Vinatje u lirua si pjesë e “shkëmbimit”, ndërsa Kasatkin, i cili u ndalua në Francë dhe përballet me ekstradim të mundshëm në Shtetet e Bashkuara të Amerikës, u lirua gjithashtu, raporton Figaro.
FSB tha se shtetasi francez ishte falur.
Vendimi u mor një ditë pas Krishtlindjeve Ortodokse, një periudhë kur faljet presidenciale janë të shpeshta në Rusi, sipas gazetës franceze.
FSB-ja publikoi gjithashtu një video të lirimit të Vinatjes, e cila e tregon atë duke dalë nga qendra e paraburgimit në dëborë, pastaj duke ngarë një makinë dhe duke hipur në një aeroplan të vogël.
Vinatje 49 vjeç, doktor i shkencave politike nga Instituti i Studimeve Politike në Paris, është specialist në hapësirën post-sovjetike dhe gjeopolitikën, dhe disertacioni i tij i doktoraturës trajtonte konfliktin në Çeçeni.
Ai punoi në Qendrën për Dialog Humanitar, një organizatë joqeveritare zvicerane që merret me diplomacinë informale dhe ndërmjetësimin në konflikte, përfshirë Ukrainën.
Ai u arrestua nga FSB-ja në qershor 2024 dhe u dënua me tre vjet burg për mosregjistrim si “agjent i huaj”, të cilin ai tha se e kishte bërë nga padija.
Autoritetet ruse pretenduan se ai po mblidhte informacione ushtarake që mund të përdoreshin kundër sigurisë ruse.
Në gusht, ai u akuzua gjithashtu për “spiunazh”, një krim i dënueshëm deri në 20 vjet burg në Rusi.
Avokati i Daniil Kasatkin njoftoi se basketbollisti rus u lirua mbrëmë dhe u kthye në Moskë.
Kasatkin u arrestua në aeroportin e Parisit më 21 qershor me kërkesë të SHBA-së, e cila e akuzon atë për pjesëmarrje në një rrjet hakerash që përdori sulme me ransomware kundër kompanive amerikane dhe institucioneve federale.
Ai i mohoi akuzat dhe avokati i tij deklaroi se nuk kishte njohuri në IT dhe se pajisja e tij ishte hakuar.
Shkëmbimi i të burgosurve ndodhi në një kohë kur marrëdhëniet midis Parisit dhe Moskës janë të tensionuara për shkak të luftës në Ukrainë, por edhe në kontekstin e aludimeve për një ripërtëritje të mundshme të dialogut midis dy vendeve, shkruan gazeta franceze.
