Kina duhet të përballet me pasoja për mbështetjen e luftës së Rusisë në Ukrainë, nëse ajo nuk ndryshon qasjen e saj.
Kështu u shpreh për BBC, shefi i NATO-s Jens Stoltenberg, sipas të cilit Pekini po vepron duke mbështetur përpjekjet e Rusisë për luftë dhe duke u përpjekur gjithashtu të ruajë marrëdhëniet me aleatët evropianë.
“Kjo nuk mund të funksionojë në planin afatgjatë,” tha Stoltenberg gjatë një vizite në Uashington.
Komentet e tij vijnë pasi Rusia nuk tregon asnjë shenjë për të lehtësuar luftën e saj kundër Ukrainës.
Kur u kërkua se çfarë mund të bëjnë anëtarët e NATO-s për mbështetjen e Kinës për Rusinë, Stoltenberg tha se kishte një “bisedë të vazhdueshme” për sanksionet e mundshme.
Ai tha se Kina “po ndan shumë teknologji, si mikroelektronikën, të cilat janë kyçe për Rusinë për të ndërtuar raketa, armë që ajo përdor kundër Ukrainës”.
“Në një fazë, ne duhet të konsiderojmë një lloj kostoje ekonomike nëse Kina nuk ndryshon sjelljen e saj”, shtoi ai.
Pekini është tashmë nën disa sanksione për mbështetjen e tij ndaj Rusisë, muajin e kaluar, SHBA njoftoi kufizime që do të synonin rreth 20 firma me bazë në Kinë dhe Hong Kong.
Kina ka mbrojtur biznesin e saj me Moskën, duke thënë se ajo nuk po shet armë vdekjeprurëse dhe “trajton me maturi eksportin e artikujve me përdorim të dyfishtë në përputhje me ligjet dhe rregulloret”.
Vizita e Stoltenberg në Uashington erdhi pasi Kremlini konfirmoi se Vladimir Putin do të udhëtojë në Korenë e Veriut të martën. Kjo pason vizitën e tij në Kinë muajin e kaluar.
