Federata e Sindikatave të Shëndetësisë së Kosovës vlerëson emërimin e zyrtarit përgjegjës për ekzekutimin e pagave, si një hap të domosdoshëm për të adresuar problemet që kanë sjellë vonesën e pagave të muajit të fundit.

Në një reagim të lëshaur për media thueht se megjithatë, nuk mund të anashkalojnë faktin se kjo situatë ka krijuar vështirësi të mëdha për të gjithë punëtorët në sektorin publik e në veçanti punëtorët shëndetësor, të cilët kanë pritur që me daljen e pagave ti përmbushin detyrimet e tyre financiare.

“Pas kësaj ngjarje FSSHK kërkon që procesi i ekzekutimit të pagave të realizohet menjëherë dhe në mënyrë të rregullt, pa vonesa të mëtejshme,vlerëson rëndësinë e përmirësimit të procedurave administrative për të shmangur çdo ndërprerje të tillë në të ardhmen duke bërë thirrje për komunikim të hapur dhe të qartë nga institucionet përgjegjëse, në mënyrë që të informohen të punësuarit e sektorit publik në kohë reale për çdo vonesë të mundshme”.

“Punëtorët shëndetësor respektivisht të gjithë të punësuarit në sektorin publik janë shtylla e shërbimeve ndaj qytetarëve dhe vonesat në pagesat e tyre nuk duhet të kthehen në një praktikë të pranueshme”.

“Përmes këtij reagimi, ne kërkojmë që institucionet përkatëse të marrin masa të menjëhershme për të garantuar që të gjitha pagat të kalohen në kohë dhe situata të tilla të parandalohen në të ardhmen”, thuhet në reagim.