Showtime

Selena Gomez, J.Lo e Eddie Vedder do mbajnë koncert për shpërndarjen e barabartë të vaksinave në gjithë botën

04/19/2021 18:34
nga:V R

Yjet e mëdha të muzikës, përfshirë edhe Jennifer Lopez dhe Selena Gomez, do të performojnë në një koncert në internet që synon mbështetjen e shpërndarjes së barabartë të vaksinave në të gjithë botën.

Së bashku me këto dy këngëtare, në koncertin “VAX LIVE: The Concert to Reunite the World” do të performojnë edhe Eddie Vedder, Foo Fighters, J Balvin dhe H.E.R.
Koncerti është pjesë e “planit global të rimëkëmbjes” së lëvizjes “Global Citizen” për të ndaluar pandeminë dhe për të ndihmuar njerëzit të rikuperohen.

“‘Koncerti për ribashkimin e botës’ feston shpresën që vaksinat u ofrojnë familjeve dhe komuniteteve anembanë botës”, thuhet në një njoftim për shtyp.

Qëllimi i kësaj ngjarjeje është të inkurajojë shpërndarjen e drejtë të vaksinave në të gjithë botën dhe “të festojmë të ardhmen duke shpresuar që familjet dhe komunitetet të bashkohen pas imunizimit”.

Disa organizata dhe udhëheqës politikë mbështetën koncertin, duke përfshirë Organizatën Botërore të Shëndetësisë (OBSH), presidenten e Komisionit Evropian Ursula von der Leyen dhe shtetin e Kalifornisë.

“Jam e nderuar të pres koncertin VAX LIVE për të ribashkuar botën”, është shprehur Selena në një deklaratë, duke shtuar se ky është një moment historik për të inkurajuar njerëzit në të gjithë botën të vaksinohen sa më shpejt që vaksina të jetë në dispozicion të tyre, duke nxitur udhëheqësit botërorë për të ndarë dozat e vaksinave në mënyrë të barabartë.

Gjithashtu, Gomez theksoi se ajo mezi pret të jetë pjesë e një projekti që do t’i bëjë njerëzit bashkë, në një mënyrë që nuk ka qenë e mundur në vitin e fundit.

Koncerti do të transmetohet më 8 maj në YouTube, radio stacione dhe aplikacione, si ABC, CBS dhe iHeart.