Sekretari britanik i mbrojtjes, Grant Shapps ndërpreu një udhëtim në Ukrainën jugore javën e kaluar për “shkaqe sigurie”, tha ministria e mbrojtjes e Mbretërisë së Bashkuar.

Atij iu desh të anulonte vizitën e tij në Odesa javën e kaluar pasi inteligjenca e Mbretërisë së Bashkuar thuhet se paralajmëroi se Rusia kishte marrë dijeni për planet e tij të udhëtimit.

Shapps do të udhëtonte  një ditë pasi një raketë goditi qytetin ndërsa presidenti ukrainas, Volodymyr Zelensky, dhe kryeministri grek Kyriakos Mitsotakis po vizitonin.

Pesë persona u vranë në sulm, thanë autoritetet ukrainase, raporton BBC, transmeton Klankosova.tv.

Shapps kishte udhëtuar me një tren gjatë natës nga Polonia në Ukrainë, i shoqëruar nga shefi i shtabit të mbrojtjes, admiral Sir Tony Radakin, dhe një ekip i vogël zyrtarësh britanikë.

Qëllimi i udhëtimit të tyre ishte të takonin Zelenskyn dhe anëtarë të lartë të administratës së tij të kohës së luftës.

Por pasi mbërriti në Kiev më 7 mars, udhëtimi i mëtejshëm i  Shapps për në Odesa u anulua papritur në minutën e fundit, pas frikës rreth sigurisë së tij.