E ardhmja e portës së Gjermanisë në Kupën e Botës 2026 mbetet ende e paqartë.

Me Marc-Andre ter Stegen që po lufton për t’u rikthyer në formën e tij më të mirë, mundësia e një rikthimi të Manuel Neuer në kombëtare është rikthyer në qendër të vëmendjes, por vetëm nëse plotësohet një kusht i veçantë.

Sipas “Bild”, portieri i Bayern Munich është i hapur ndaj një rikthimi, por kërkon që trajneri i kombëtares Julian Nagelsmann ta kontaktojë personalisht dhe t’i shprehë dëshirën e qartë për ta rikthyer në ekip.

Deri tani, vetëm drejtori sportiv i DFB-së, Rudi Voller, ka pasur komunikim të kufizuar me lojtarin për këtë çështje.

Neuer, i cili mbush 39 vjeç, e sheh të mundur bashkëpunimin me Nagelsmann në Kupën e Botës në SHBA, Kanada dhe Meksikë, por nuk dëshiron ta bëjë këtë çështje publike.

Ai synon të ruajë respektin ndaj portierëve aktualë të kombëtares dhe të shmangë çdo keqkuptim brenda grupit.