Jerome Rothen, ish-reprezentuesi francez që luajti për Monacon dhe Paris Saint-Germain, kritikoi ashpër qëndrimin e skuadrës argjentinase në ndeshjen kundër Brazilit, në Maracana, të martën e kaluar. 

Ai poashtu kishte kritika të mëdha për fituesin e ‘Topit të Artë’, Leo Messi, përcjell GazetaBlic Sport.

“Argjentina është kampione e botës, por nuk është skuadra më e mirë në botë. I përgëzoj për këtë, por lojtarët janë larg të qenit më të mirët në botë. Ata ankohen shumë, por janë të parët që sulmojnë kundërshtarët e tyre, duke filluar nga Messi. Më parë ai kishte imazhin e një djali të ëmbël, të pashëm, por tani maska ​​ka rënë dhe ne e kemi parë se si është në të vërtetë personaliteti i tij”, filloi duke thënë ish-anësori francez në programin e tij Rothen s’enflamme, në RMC Sport.

“Në ditët e sotme as që mund ta prekësh, nëse nuk merr të njëjtin trajtim që mori Rodrygo dhe ai thotë ‘Unë jam kampion bote’. Kjo skuadër e Argjentinës është një reflektim i argjentinasve, të cilët ndihen superiorë ndaj të tjerëve pa asnjë arsye të dukshme. Ata duhet të kenë më shumë klas”, përfundoi Rothen.

/GazetaBlic Sport/