Dëshmitari V.P ka deklaruar se ditën kritike kishte parë që njëri nga dy personat e ka nxjerrë revolen nga çanta dhe e ka futur në brez.
Në deklarim të tillë, V.P e dha të mërkurën në Gjykatën Themelore në Prishtinë duke u përgjigjur në pyetjet e prokurorit Armend Hamiti, në rastin ku Masar Gërdovci dhe Sherif Krasniqi po akuzohen për vrasjen e rojës në lokalin “Bon Vivant”, raporton “Betimi për Drejtësi”.
“Në pjesën e tretë kam pa dy persona duke bisedu me të ndjerin cili ka qenë në cilësinë e sigurimit, pastaj e kam kthyer kokën të vazhdoj punën time dhe pas pak çastesh kam parë se njëri nga dy personat ka nxjerrë revolen nga çanta dhe e ka fut në brez”, ka deklaruar dëshmitari V.P.
Më pas ai ka thënë se është distancuar pak duke larguar edhe shikimin dhe kur e ka nxjerrë revolen ia ka drejtuar atë një personi të cilin nuk e ka parë.
“Pastaj në atë moment jam distancuar pak për me pas siguri dhe e kam larguar shikimin, kur kam kthyer kokën e kam parë se personi që e ka nxjerrë revolen ia ka drejtuar atë nuk e di saktë se kujt dhe në atë moment jam ulë në toke dhe pastaj pas s’di sa kohe kam dëgjuar disa krisma në pjesën tjetër të lokalit, të përparmë”, deklaroi dëshmitari V.P.
Tutje, ai ka thënë se kur është ndierë më i sigurt ka shkuar ta shohë se çfarë ka ndodhur dhe ka parë tani të ndjerin të shtrirë.
“Pastaj kur e kam ndje veten pak më të sigurt kam dal me shiku se çfarë ka ndodh jashtë dhe e kam pa viktimën në këtë rast Rr.U. të shtrirë në tokë duke lëvizur”, ka deklarua V.P.
Në vazhdim ai ka deklaruar se nuk është në dijeni nëse lokali ka pasur kamera ose nëse ato kanë qenë funksionale.
“Nuk e di, nashta edhe ka pas po se di saktë se a kanë qenë funksionale nëse ka pas”, ka thënë dëshmitar.
Në pyetjen e prokurorit Hamiti nëse i njëjti qëndron pranë deklaratës së dhënë më 10 janar 2015, dëshmitari V.P deklaroi se qëndron në tërësi pranë të gjitha gjërave të thëna më herët.
Ai gjithashtu, edhe në pyetjen e përfaqësuesit të palës së dëmtuar, avokatit Armend Krasniqi ka deklaruar se qëndron pranë deklaratës së dhënë në prokurori më 3 prill 2015.
Tutje, njëjti duke u përgjigjur në pyetjet e mbrojtësit të të akuzuarit Masar Gërdovci, avokatit Naim Rudari ka deklaruar se krismat e të shtënave janë dëgjuar në pjesën e përparme nga hyrja e lokalit.
“Krismat janë dëgjuar në pjesën e përparme nga terasa tek hymja e lokalit nga rruga kryesore” ka deklaruar dëshmitari Polloshka.
Në pyetjen e avokatit Rudari se ku ka qenë i shtrirë tani i ndjeri në momentin që ai është afruar për t’i dhënë ndihmë, dëshmitari V.P tha se i njëjti ka qenë i shtrirë tek hyrja e lokalit tek një shkallë e vogël.
“Në pjesën e përparme tek hyrja ku ka qenë si shkallë e vogël, si pllato”, ka thënë i njëjti.
Tutje, duke u përgjigjur në pyetjet e mbrojtësit të të akuzuarit Sherif Krasniqi, avokatit Haxhi Millaku ai ka deklaruar se qëndron edhe pas deklarimit në rikonstruim të vendit të ngjarjes.
“Po e mbështes deklarimin që e kam dhënë në rikonstruim”, ka thënë V.P.
Ai në vazhdim, ndër të tjera ka deklaruar se nuk i kujtohet nëse ka pasur armë edhe personi tjetër mirëpo qëndron pranë deklaratave të mëhershme.
“Nuk më kujtohet saktë se a ka pasur armë edhe personi tjetër por nëse e kam cek më herët në deklaratat e mia i mbështes plotësisht ato çka kam deklaruar”.
Dëshmitari V.P, gjithashtu në pyetjen e avokatit Millaku nëse e ka penguar diçka që të shohë nëse personi i veshur me të zeza në vendin e ngjarjes ka pasur diçka në dorë apo jo, ka thënë se për periudhën që i njëjti ka shpjeguar ngjarjen e ka parë plotësisht dhe nuk i kujtohet nëse ai ka pasur diçka në dorë apo jo.
“Lidhur me periudhën sa unë e kam shpjeguar ngjarjen e kam pa plotësisht, saktë nuk po më kujtohet se a ka pas diçka apo jo në dorë”, ka thënë V.P.
Në vazhdim, duke u përgjigjur në pyetjet e trupit gjykues i njëjti ka deklaruar se vendi ku i njëjti është përulur tek shanku është rreth 3 ose 4 metra larg vendit ku janë dëgjuar krismat.
“3 ose 4 metra, nuk më kujtohet saktësisht”, tha ai.
Tutje, ai ka deklaruar se qëndron pranë gjithë deklarimeve që ka dhënë më herët.
“Po mbetem në tërësi pranë të gjitha deklarimeve që kam dhënë më herët”, ka thënë ai.
Gjithashtu, në këtë seancë avokati Millaku ka propozuar që të ndërpritet masa e paraburgimit për të mbrojturin e tij mirëpo një propozim i tillë është refuzuar nga trupi gjykues.
Pasi që ishte fundi i orarit të punës, seanca u ndërpre dhe e radhës pritet të mbahet më 29 korrik.
Ndryshe, në seancën e 4 marsit 2022, gati 7 vite prej ngritjes së aktakuzës për vrasjen e rojës së lokalit “Bon Vivant”, aktakuza ndaj dy të përfshirëve në këtë rast, Masar Gërdovcit dhe Sherif Krasniqit, është ndryshuar.
Sipas prokurorit Armend Hamitit, nuk është Sherif Krasniqi ai që ka privuar nga jeta të ndjerin Rr.U, siç përshkruhet në aktakuzën e vitit 2015, por Masar Gërdovci.
“I akuzuari Sherfi Krasniqi fillimisht fjaloset dhe e godet të ndjerin me grushte në prani të mysafirëve të tjerë në lokal i pandehuri Masar Gërdovi nxjerr revolen nga çanta që mbante në krahë, e repetit ia drejton të ndjerit Rr.U. por arma i bllokohet, prapë e tërheq këmbëzën, por revolja sërish nuk shkrep dhe derisa i ndjeri Rr.U. përkulet, i akuzuari Masar fillon të lëvizë në drejtim të daljes nga dera kryesore e lokalit, tani i ndjeri Rr.U. i vihet nga pas të akuzuarit Masar, ndërsa nga pas e kapë duke e goditur i akuzuari Sherif dhe me këtë thellësisht i kontribuon kryerjes së veprës penale. Kështu të tre kacafyten para daljes së lokalit ashtu duke u rrahur me të ndjerin, në momentin kur tani të akuzuarit dhe tani i ndjeri ndodhen në hapësirën e tarracës së përparme, i akuzuari Masar me dashje duke vënë në rrezik jetën e personave të tjerë në lokal ka privuar nga jeta tani të ndjerin duke shkrepur me revole dy-tri herë në distancë afërsisht 1 metër në drejtim të tani të ndjerit, duke i shkaktuar dy plagë tejshkuese”, kishte thënë prokurori Hamiti.
Gjykata Themelore në Prishtinë kishte marrë dy herë aktgjykime dënuese, mirëpo këto aktgjykime ishin anuluar nga instancat më të larta të gjyqësorit.
Së fundi, Gjykata Supreme rastin e ka kthyer në rigjykim pasi që sipas kësaj instance të akuzuarit Gërdovci dhe Sherifi, janë shpallur fajtorë për veprime të cilat dallojnë nga ato për çka janë akuzuar.
Gjykata Themelore në Prishtinë kishte vendosur dy herë për këtë rast, fillimisht në vitin 2019, ku kishte shpallur fajtorë për vrasje vetëm të akuzuarin Gërdovci, e më pas në vitin 2020 ku kishte shpallur fajtorë dy të akuzuarit për vrasje në bashkëkryerje.
Më 22 janar 2019 ishte shpallur aktgjykimi ndaj të akuzuarve, pasi paraprakisht ishte kuptuar se tre muaj para se të ngritej aktakuza ndaj Masar Gërdovcit dhe Sherif Krasniqit, prokuroria kishte asgjësuar provat në këtë rast.
Para shpalljes së aktgjykimit, gjykatësja e ngarkuar me këtë lëndë, Suzana Çerkini, kishte kërkuar nxjerrjen e dy ekspertizave forenzike, por më pas kishte njoftuar palët në procedurë se nëpërmes përgjigjes me shkrim nga Agjencia Kosovare e Forenzikës, kishte njoftuar se arma me të cilën dyshohet të jetë kryer vepra penale në këtë rast nuk ishte dorëzuar fare në agjenci.
Lidhur me këtë gjykatësja Çerkini, kishte njoftuar palët se përmes një raporti nga Drejtoria Rajonale e Policisë, ishte njoftuar se arma në fjalë, është shkatërruar.
Me aktgjykimin e vitit 2019 Masar Gërdovci, ishte dënuar me 21 vjet e 8 muaj burgim, pasi që ishte shpallur fajtor për vrasje, ndërkaq Sherif Krasniqi, ishte dënuar me 4 vjet e 3 muaj, për veprën penale pjesëmarrje në rrahje, pasi që ndaj tij ishte bërë ricilësimi i veprës penale nga vrasje e rëndë në bashkëkryerje, në pjesëmarrje në rrahje.
Dënimi prej 4 vite e tre muaj burgim ndaj Krasniqit kishte qenë bazuar në nenin 190, paragrafi 1 i Kodit Penal të Kosovës, i cili për veprën penale “pjesëmarrje në rrahje” parasheh dënimin me gjobë ose me burgim deri në 3 vite. Andaj vendimi i gjykatës për të shqiptuar një dënim më të lartë sesa ai që është paraparë me Kodin Penal të Kosovës konsiston në shkelje kushtetuese dhe ligjore nga ana e gjykatës, çfarë e bën këtë aktgjykim kundërkushtetues dhe të kundërligjshëm.
Ky vendim i Gjykatës Themelore në Prishtinë është ankimuar në Gjykatën e Apelit nga Prokuroria Themelore në Prishtinë dhe mbrojtësit e të akuzuarve, të cilët kishin kërkuar rigjykim.
Kolegji i gjyqtarëve të Apelit i përbërë nga kryetari Xhevdet Abazi, gjyqtari referues Abdullah Ahmeti dhe anëtari Kreshnik Radoniqi, më 18 tetor 2019, kishin shqyrtuar ankesat e Prokurorisë Themelore në Prishtinë, palës së dëmtuar dhe mbrojtësve të të dënuarve.
Prokuroria Themelore në Prishtinë, nuk ishte pajtuar me ricilësimin e veprës penale ndaj të akuzuarit Krasniqi, pasi që sipas saj gjykata e shkallës së parë gabimisht ka bërë ricilësimin e veprës penale.
Mbrojtësi i të akuzuarit Krasniqi, avokati Haxhi Millaku nuk ishte pajtuar me vendimin e gjykatës që ndaj të mbrojturit të tij të shqiptojë dënim më të lartë sesa ai i paraparë me Kodin Penal të Kosovës, pasi që sipas tij dënimi prej 4 vjet e 3 muaj ndaj të mbrojturit të tij, siç tha ai, e tejkalon maksimumin e dënimit të paraparë me Kodin Penal të Kosovës.
Rigjykim për të mbrojturin e tij kishte kërkuar edhe avokati Besnik Berisha, duke konsideruar se i mbrojturi i tij, Masar Gërdovci nuk është kryes i veprës penale.
Pas ankesave, Gjykata e Apelit rastin e kishte kthyer në rigjykim duke konstatuar se aktgjykimi i shkallës së parë përmban shkelje esenciale të dispozitave të procedurës penale, të cilat kushtëzojnë anulimin e aktgjykimit. Sipas Apelit, arsyet e dhëna në aktgjykim janë të paqarta dhe kundërthënëse.
Disa muaj pas kthimit në rigjykim, Gjykata Themelore në Prishtinë kishte caktuar seancën e rigjykimit në këtë rast.
Pas rigjykimit i cili kishte zgjatur dhjetë muaj, gjykata e shkallës së parë sërish kishte marrë aktgjykim dënues, ashtu që të akuzuarit Masar Gërdovci dhe Sherif Krasniqi, i kishte shpallur fajtorë për vrasjen e rojës në lokalit “Bon Vivant”.
Sipas aktgjykimit që ishte shpallur nga kryetarja e trupit gjykues, Suzana Çerkini, i akuzuari Gërdovci ishte dënuar me 18 vite burgim për veprën penale të vrasjes në bashkëkryerje, ndërsa të njëjtit gjykata i ka shqiptuar edhe 1 mijë e 500 euro gjobë për veprën penale të armëmbajtjes pa leje.
Ky aktgjykim ishte atakuar sërish në Gjykatën e Apelit, ka qenë prokuroria ajo që ka kërkuar ashpërsimin e dënimit ndaj të akuzuarve.
Ankesë mbi të gjitha bazat ankimore kishin ushtruar mbrojtësit e të akuzuarve, avokatët Naim Rudari dhe Haxhi Millaku.
Gjykata e Apelit kishte aprovuar ankesën e prokurorisë dhe dënimin ndaj të akuzuarit Krasniqi e kishte ashpërsuar në 8 vite burgim, derisa pjesa tjetër e aktgjykimit kishte mbetur e pandryshuar.
Ndryshe, në Gjykatën Themelore në Prishtinë me këtë lëndë ka qenë e ngarkuar gjykatësja Suzana Çerkini, e cila në trupin e parë gjykues kishte pasur gjykatësit Vesel Ismajli dhe Shpresa Hasaj – Hyseni, ndërkaq pas rigjykimit kishte qenë në trup gjykues me gjykatësen Shpresa Hasaj – Hyseni dhe gjykatësin Isuf Makolli.
Në Gjykatën e Apelit, kjo lëndë ishte gjykuar dy herë nga kolegji i njëjtë përbërë nga gjykatësit Xhevdet Abazi, Abdullah Ahmeti dhe Kreshnik Radoniqi.
Ndërsa në Gjykatën Supreme, kjo lëndë është gjykuar nga gjykatësit Mejreme Memaj, Nesrin Lushta dhe Agim Maliqi.
Aktakuza ndaj Masar Gërdovcit dhe Sherif Krasniqit ishte ngritur nga Prokuroria Themelore në Prishtinë më 7 korrik 2015.
Ata thuhet se në bashkëkryerje, kishin privuar nga jeta të ndjerin Rr.U, duke kryer kështu veprat penale vrasje të rëndë dhe armëmbajtje pa leje.
Sipas prokurorisë, më 13 tetor 2014, Masar Gërdovci dhe Sherif Krasniqi, kishin shkuar në lokalin “Bon Vivant”, i cili gjendet në rrugën “Rexhep Luci”, në Prishtinë.
Sipas aktakuzës, me të hyrë brenda në lokal, menaxheri i lokalit Ilir Misini, i pyet të pandehurit se a kishin rezervuar ku të njëjtit ishin përgjigjur “Ne asnjëherë nuk kemi bërë rezervim” dhe kishin vazhduar të ulen në tarracë, në pjesën e pasme të lokalit.
Në aktakuzë thuhet se menaxheri i lokalit i kishte thënë tani të ndjerit Rr.U, të merret me të pandehurit që t’i largojë nga lokali, i cili ishte ofruar tek tavolina ku ishin ulur ata, me qëllim për t’i larguar nga lokali pasi të njëjtit nuk kishin rezervim.
Sipas aktakuzës, sapo Rr.U largohet dhe hyn në sallën e lokalit, të pandehurit ngriten nga tavolina dhe shkojnë në drejtim të tij, ku fillojnë ta sulmojnë me grushte.
Gjithnjë sipas aktakuzës, me qëllim që ta privojnë nga jeta fillimisht Masar Gerdovci, e kishte nxjerrë revolen nga çanta e tij dhe kishte shtënë në drejtim të punëtorit të sigurimit Rr.U, i cili ishte përulur në atë moment për t’i shmangur goditjeve.
Në aktakuzë thuhet se, Rr.U, me t’u ngritur në këmbë niset në drejtim të tashmë të pandehurve që në moment ishte duke shkuar në drejtim të daljes nga lokali, papritmas i pandehuri Sherif Krasniqi, me dashje që ta provojë nga jeta merr revolen nga Masar Gërdovci dhe shkrep dy herë në drejtim të tani të ndjerit me, ç‘rast e plagos në regjionin e gjoksit dhe si pasojë e gjakderdhjes masive nga plagët e marra, ndërron jetë në QKUK.
