Ndër shumë objektivat e operacionit ushtarak të javës së kaluar që kapi presidentin venezuelian Nicolas Maduro ishte edhe t’i dërgonte Kinës një mesazh: qëndro larg nga Amerika, shkruan agjencia ndërkombëtare e lajmeve, Reuters, në një analizë.

Prej të paktën dy dekadash, Pekini ka kërkuar të ndërtojë ndikim në Amerikën Latine, jo vetëm për të ndjekur mundësi ekonomike, por edhe për të fituar një pozicion strategjik pranë rivalit të tij kryesor gjeopolitik.

Progresi i Kinës – nga stacionet e gjurmimit satelitor në Argjentinë dhe një port në Peru te mbështetja ekonomike për Venezuelën – ka qenë një bezdi për administratat e njëpasnjëshme amerikane, duke përfshirë atë të Donald Trump.

Disa zyrtarë të administratës Trump i thanë Reuters se veprimi i presidentit amerikan kundër Maduros synonte pjesërisht të kundërshtonte ambiciet e Kinës, dhe se ditët e Pekinit duke përdorur borxhin për të përfituar naftë të lirë nga Venezuela kishin “mbaruar”.

“NUK JU DUAM ATY”

Trump e bëri mesazhin të qartë të premten, duke shprehur shqetësim me Kinën dhe Rusinë si “fqinje” të afërt, gjatë një takimi me drejtues të industrisë së naftës.

“U thashë Kinës dhe Rusisë, ‘Shkojmë shumë mirë me ju, ju pëlqejmë shumë, nuk ju duam atje, nuk do të jeni atje’”, tha Trump. Tani, shtoi ai, ai do t’i thotë Kinës se “ne jemi të hapur për biznes” dhe se ata mund të “blejnë gjithë naftën që duan nga ne atje ose në Shtetet e Bashkuara”.