Anëtari i kryesisë së Aleancës për Ardhmërinë e Kosovës (AAK), njëherësh kandidat për deputet, Daut Haradinaj, duke reaguar lidhur me reduktimet me rrymë, ka thënë se ky abuzim me popullin duhet të marrë fund.

Ai ka treguar për gjendjen e mjerueshme në Ferizaj, ku dje ka pasur mungesë të rrymës në një zonë për 8 orë, raporton Gazeta Blic.

Përmes një postimi në Facebook, Daut Haradinaj ka thënë se kemi trefishim të faturave dhe 1/3 e ditës pa rrymë në mes të dimrit në vitin 2024.

Postimi i tij i plotë:

Isha mbrëmë në Ferizaj dhe po tregonin gjendjen e mjerueshme. Në mungesë të rrymës, vetëm në një zonë të qytetit ndërprerja e rrymës ishte 8 orë, nga ora 23:00 deri në 07:00 në mëngjes. Pra, trefishim i faturave dhe 1/3 e ditës pa rrymë në mes të dimrit në vitin 2024. Kjo mendësi qeverisjeje dhe ky abuzim me popullin duhet të marrë fund.

Hajnia me GEN-in ka emër!