Shkruan: Drizan Shala
Rasti i arrestimit të shtetasve të huaj (bjellorusë dhe Rus ) në Arllat përbën një moment të rëndësishëm për mënyrën se si duhet lexuar funksionimi i arkitekturës së sigurisë në Kosovë dhe roli i koordinimit ndërinstitucional në menaxhimin e rreziqeve potenciale.
❗️Së pari – bashkëpunimi ndërinstitucional PK–AKI
Ky zhvillim e nxjerr në pah funksionimin praktik të bashkëpunimit ndërmjet Policisë së Kosovës dhe Agjencisë së Kosovës për Inteligjencë në rastet kur ekzistojnë dyshime për elemente që mund të cenojnë sigurinë kombëtare. Arrestimet e këtij lloji zakonisht janë rezultat i proceseve të mbledhjes së informacionit, analizës së rrezikut dhe verifikimit operacional, çka nënkupton se institucionet kanë vepruar sebashku dhe në mënyrë të koordinuar. Për publikun, ky është sinjal i rëndësishëm se mekanizmat e sigurisë nuk veprojnë të izoluar, por si një sistem i integruar.
❗️Së dyti – shkëmbimi i informacionit në kohë reale
Koha e reagimit në raste të tilla është tregues kyç i nivelit të besueshmërisë ndërinstitucionale dhe ndërveprueshmërisë operacionale. Faktohet se ekziston një rrjedhë funksionale e shkëmbimit të informacionit në kohë reale, që mundëson reagim të shpejtë dhe parandalim të rreziqeve potenciale. Ky dimension është kritik në një mjedis sigurie ku kërcënimet janë gjithnjë e më hibride dhe shpesh kërkojnë reagim të sinkronizuar mes inteligjencës dhe zbatimit të ligjit.
❗️Së treti – nevoja për investime të vazhdueshme në siguri
Raste të tilla rikujtojnë se investimi në sektorin e sigurisë duhet të jetë proces i vazhdueshëm dhe në rritje. Sfida të natyrës së sigurisë kombëtare kërkojnë kapacitete moderne teknologjike, analitike dhe operative për të siguruar masa parandaluese në kohë reale. Për këtë arsye, zhvillimet e fundit e forcojnë argumentin për rritje të kapaciteteve dhe burimeve, në mënyrë që institucionet të mbeten një hap përpara ndaj rreziqeve potenciale.
❗️Së katërti – motivi dhe synimi i të arrestuarve
Qëllimi dhe objektivat e personave të arrestuar pritet të bëhen më të qarta vetëm pas përfundimit të hetimeve nga mekanizmat përkatës të sigurisë dhe drejtësisë. Megjithatë, fakti që rasti është trajtuar me seriozitet dhe në fazë të hershme tregon rëndësinë e qasjes parandaluese dhe të monitorimit të vazhdueshëm të çdo aktiviteti që mund të përbëjë rrezik potencial.
