Rafael Leao pranon se ai nuk është ‘lojtari perfekt’ dhe nuk ka ‘asgjë kundër’ trajnerit të Milanit, Paulo Fonseca, por ende ‘nuk pajtohet’ me disa kritika për etikën e tij të punës.

Sulmuesi aktualisht është në detyrë ndërkombëtare me Portugalinë dhe besimi i tij u rrit ndjeshëm nga performanca e tij në Bernabeu, ku Milani mundi Real Madridin 3-1 në Ligën e Kampionëve.

Megjithatë, ai u akuzua ende nga eksperti i Sky Sport Italia dhe ish-mbrojtësi i kuqezinjve, Alessandro  Costacurta, se luan vetëm gjatë ndeshjeve të mëdha dhe kishte një etikë të dobët pune, që do të thotë se ai nuk ishte në 100 lojtarët më të mirë në botë.

“Është e qartë se nuk jam dakord me këtë”, iu përgjigj Leao gazetarëve në kampin portugez.

“Kam kaluar një sezon të mrekullueshëm te Milani, por, si gjithë të tjerët, ka ulje-ngritje. Sezoni sapo ka filluar. Shiko, e di që nuk jam lojtari perfekt dhe ndonjëherë mund të bëj shumë më mirë.

“Nuk jam i tronditur nga kjo kritikë, kam njerëz që më ndihmojnë të përmirësohem dhe ata janë ata që duhet t’i dëgjoj. Kjo kritika thjesht më shtyn të përgjigjem në fushë”, përfundoi ai.

/GazetaBlic Sport