Pas vdekjes tragjike të kirurgut, Halil Tanaj, i cili vdiq mbrëmë pasi dyshohet se ra në kontakt me rrymën, ka reaguar edhe Shërbimi Spitalor Klinik Universitar i Kosovës.

Ata kanë shprehur ngushëllime për vdekjen e kirurgut të njohur, teksa e kanë përshkruar si profesionist, i përkushtuar në punën e tij dhe njeri i dashur.

“Shërbimi Spitalor dhe Klinik Universitar i Kosovës, me dhimbje dhe pikëllim të thellë ka pranuar lajmin për vdekjen e mjekut të përkushtuar, e të shquar, Dr. Halil Tanaj. ShSKUK, ngushëllon familjen, miqtë dhe kolegët me rastin e vdekjes së Dr. Tanaj. Dr. Halili ishte profesionist i shquar, njeri human dhe e përkushtuar për ofrim të shërbimeve shëndetësore. Ai deri në momentet e fundit ishte përkrah pacientëve, ndaj të cilëve ishte shumë i përkushtuar. Familja humbi njeriun më të dashur, kurse ShSKUK një profesionist me vyrtyte të larta njerëzore dhe profesionale. Dr. Halili, do të mbetet çdoherë në mendjet tona, si njeri dhe profesionist i përkushtuar, shembull që do të shërbejë për gjenerata të tëra, edhe pse fizikisht u nda nga ne!”, thuhet në njoftim.