Policia e Kosovës përmes një raporti të publikuar ka shpalosur detaje nga operacionet gjatë verës.

Nga ky njoftim mësohet se gjatë sezonës së verës në dasma e ahengje të ndryshme janë arrestuar 81 persona e janë konfiskuar 112 armë, përcjell GazetaBlic.

Më poshtë edhe postimi i plotë.

Policia e Kosovës për të shtëna me armë në dasma e ahengje gjatë verës ka arrestuar 81 të dyshuar dhe konfiskuar 112 armë
Prishtinë, më 8 shtator 2021
Policia e Kosovës gjatë kësaj vere, konkretisht nga 28 qershori 2021 e deri më sot, ka qenë shumë e angazhuar në parandalimin e të shtënave me armë në ahengje e dasma.
Patrullat policore gjithandej vendit kanë monitoruar këto lloj festimesh (dasma dhe ahengjet e ndryshme), me qëllim parandalimin e përdorimit të armëve të zjarrit për ‘të festuar’.
Aktivitete policore kanë ndikuar në reduktim të rasteve të tilla, por prap ka pasur raste kur edhe janë përdorur armët për qëllime të tilla.
Çdo herë ku policia ka pasur informatë nga qytetarët apo gjatë patrullimeve është ardhur deri tek informata se në një rast të tillë janë përdorur armët, policia ka intervenuar. Kështu, gjatë kësaj kohe për shkak të të shtënave me armë, policia ka arrestuar 81 (tetëdhjetë e një) persona, ka konfiskuar: 91 (nëntëdhjetë e një) revole dhe 21 (njëzet e një) armë të gjata. Policia ka iniciuar raste penale si: ‘armëmbajtje pa leje’ ose ‘shkaktim i rrezikut të përgjithshëm’ për ata persona që dyshohet të jenë përfshirë në raste të tilla.
Fatbardhësisht në këto raste nuk ka pasur persona të lënduar.

/GazetaBlic/