Njohësi i çështjeve të sigurisë, Nuredin Ibishi, në një intervistë dhënë për “Gazeta Blic” ka folur në lidhje me procesin e betimit të kryetarëve të Zveçanit dhe Zubin Potokut që pritet të mbahet nesër në Veri.
Ibishi tha se nesër mund të ketë tensione të krijuara artificialisht nga grupet e dirigjuara nga Vuçiq, me qëllim që situata të paraqitet e tensionuar.
“Prisja një sprovë me konstituimin e Asamblesë Komunale dhe kryetarit e nënkryetarit në Mitrovicën e Veriut dhe ajo shkoi mirë, nuk pati as protesta as tensione të sigurisë. Por tash në vazhdim Lista Serbe me nënkryetarin Igor Simiq ka paralajmëruar, se nëse deri me 1 Qershor nëse nuk pushojmë krijimet e institucioneve në Veri, atëherë do të fillojnë protesat dhe do të zgjedhin mjete me qëllim që të pengojnë edhe konstituimin e Asambleve komunale me kryetarët dhe nënkryetarët por edhe çështje të tjera që ata i lidhin me kërkesën e tyre të vazhdueshme për krijimin e Asociacionit. Situatën ata artificialisht e paraqesin të tensionuar, gjegjësisht do të krijojnë situata të tilla me qëllim që të pengojmë mbarëvajtjen e betimit të dy kryetarëve në dy komunat nesër. Mendoj se këto paralajmërime janë vetëm një vazhdim i adresimit të kërcënimeve nga Lista Serbe dhe ekstremistë të tjerë që vijnë të adresuar nga presidenti i një vendi fqinj, Aleksandër Vuçiq. Ai ngrit menjëherë tensione me dhënien e urdhërave për veprim destruktiv me qëllim që ta ndihmojnë Bashkësinë Ndërkombëtare, kinse serbët janë të kërcënuar, nuk janë të përfshirë në institucione” tha Ibishi për “Gazeta Blic”
Ai tutje shtoi se Qeveria dhe institucionet e tjera kanë bërë gjithçka për kthimin e serbëve në institucione.
“Realisht Qeveria e Kosovës dhe institucionet e tjera kanë bërë gjithçka që ata të jenë pjesë e institucioneve, por ata i kanë injoruar dhe bojkotuar me largime prej Policisë së Kosovës, nga Gjykatat, Prokuroria dhe kryetarët e komunave që tani po rithemelohen pas zgjedhjeve” deklaroi ai për “Gazeta Blic”
Intervistën e plotë të Nuredin Ibishit e ndiqni në faqen e Facebook të “Gazeta Blic”.
