Tottenham Hotspur është i vendosur të nënshkruajë me Franck Kessié në afatin kalimtar të janarit, por sipas burimeve të shumta në Itali, Milani ka refuzuar një marrëveshje shkëmbimi që përfshin Tanguy Ndombele.

Kessie nuk është i gatshëm të nënshkruajë një zgjatje të kontratës me kuqezinjtë, që do të thotë se ai do të largohet nga klubi si agjent i lirë në fund të sezonit, përcjell GazetaBlic Sport.

Milani ka qenë në bisedime me agjentin e tij George Atangana për një kohë të gjatë, por përfaqësuesi i mesfushorit të Fildishtë ka kërkuar një marrëveshje të re 8-9 milionë euro në vit, ndërsa kuqezinjtë ofruan një kontratë 6,5 milionë euro në vit.

Sipas SportMediaset dhe Il Corriere della Sera, Tottenham dëshiron të nënshkruajë me ish-yllin e Atalantas në janar dhe i ka ofruar Ndombele si një marrëveshje të mundshme shkëmbimi.

Megjithatë, Milani e ka refuzuar propozimin dhe dëshiron të vazhdojë me Kessie deri në fund të sezonit edhe nëse e dinë se mund të mos marrin asgjë nga largimi i tij në korrik.

/GazetaBlic Sport/