Federata Norvegjeze e Futbollit (NFF) ka njoftuar se të ardhurat nga ndeshja kualifikuese e Kupës së Botës me Izraelin në tetor do t’i dhurohen organizatës Mjekë pa Kufij, e cila ofron ndihmë humanitare në Gaza.

Të hënën, NFF njoftoi bashkëpunimin e saj me organizatën e pavarur, e cila ka ofruar ndihmë mjekësore emergjente në mbi 70 vende të prekura nga luftërat, fatkeqësitë natyrore dhe epidemitë.

Federata tha se fondet e mbledhura do të “destinohen për ndihmën humanitare emergjente të organizatës në terren në Gaza”.

Norvegjia pret Izraelin në Oslo më 11 tetor.

“Kemi mundësinë të kualifikohemi për një kampionat ndërkombëtar për meshkuj për herë të parë në 26 vjet. Në të njëjtën kohë, ndeshja po luhet në një kohë të shënuar nga vuajtje të rënda humanitare dhe konflikte të thella në Lindjen e Mesme.”

Si anëtar i FIFA-s dhe UEFA-s, NFF duhet të trajtojë pjesëmarrjen e Izraelit në garat e tyre. Në të njëjtën kohë, ne nuk mund dhe nuk do të qëndrojmë indiferentë ndaj vuajtjeve humanitare që po ndodhin në rajon, veçanërisht sulmeve ndaj civilëve në Gaza.

“Ne duam t’i dhurojmë të ardhurat për një organizatë që shpëton jetë në Rripin e Gazës çdo ditë dhe kontribuon në ndihmën aktive emergjente në terren, gjë që bën “Mjekët pa Kufij”, shkruhet në njoftim.