Jose Mourinho është pa punë që nga fillimi i vitit pasi u shkarkua nga Roma. Portugezi ka qenë i lidhur me disa klube, por ende nuk ka marrë përsipër ndonjë ekip.

Ai mori një ofertë të re. Ish-trajneri i Chelsea, Manchester United dhe Tottenham ka marrë një ofertë të re nga Arabia Saudite, këtë herë drejtuesit e Al Shabaab duan ta shohin atë në krye të skuadrës.

Siç raportojnë mediat e huaja, drejtuesit e këtij klubi po mundohen në çdo mënyrë që të bindin Mourinhon që të pranojë ofertën dhe të vijë të punojë në skuadër.

Kjo do të jetë lëvizja e parë e Al Shabaab në betejën me Al Ittihad, Al Ahli, Al Nassr dhe Al Hilal për vendin e parë në Arabinë Saudite.

“Asgjë nuk është finalizuar ende, por ai është zgjedhja e parë e bosëve të Al-Shabaab,” tha Ben Jacobs, një gazetar që pretendoi se Mourinho do të pranonte ofertën nga Arabia Saudite.

Së fundmi edhe vetë portugezi ka deklaruar se dëshiron t’i rikthehet stërvitjes.

“Nuk dua të pushoj, dua të punoj”, ka thënë Mourinho.

Përveç kësaj, mediat e huaja pohojnë se është rregulluar një takim mes drejtuesve të Al-Shabaab dhe Mourinhos, me temë kryesore marrjen e skuadrës nga portugezi.

/GazetaBlic Sport