Kryeministri izraelit Benjamin Netanjahu u zotua të rimarrë kontrollin e kufirit të Rripit të Gazës me Egjiptin, duke zgjeruar misionin e Izraelit për të neutralizuar Hamasin në një konflikt që thotë se pret të zgjasë me muaj.

“Lufta është në kulmin e saj”, u tha Netanjahu gazetarëve të shtunën për luftimet që nga 7 tetori kur grupi militant palestinez Hamas dhe aleatët e tij depërtuan në Izrael, duke vrarë 1,200 njerëz dhe duke kapur 240 pengje.

Ai tha se zona tampon e Korridorit Filadelfi që kalon përgjatë kufirit të Gazës me Egjiptin duhet të jetë në duart e Izraelit.

“Duhet të mbyllet”, tha Netanjahu. “Është e qartë se çdo marrëveshje tjetër nuk do të siguronte çmilitarizimin që ne kërkojmë”.

Ai nuk dha hollësi, por një lëvizje e tillë nga Izraeli do të ishte një përmbysje de-facto e tërheqjes së tij nga Gaza në vitin 2005, duke e vendosur enklavën nën kontrollin ekskluziv të Izraelit pas vitesh të tëra të drejtuar nga Hamasi.

Komentet e Netanjahut për zonën tampon erdhën ndërsa forcat ushtarake izraelite vazhduan me një ofensivë që kryeministri përsëriti se do të zgjasë “për shumë muaj të tjerë”.

Pas inkursionit të befasishëm të Hamasit në tetor, Izraeli nisi një sulm në shkallë të plotë në Gaza, duke zhvendosur pothuajse të gjithë 2.3 milionë banorët e saj dhe duke vrarë të paktën 21,672 palestinezë, sipas autoriteteve shëndetësore në Gaza, me më shumë se 56,000 të plagosur dhe mijëra të tjerë dyshohet se kanë vdekur, shkruan BBC.