Seanca e së martës në Gjykatën Themelore në Prishtinë ndaj ish kryeshefit të PTK-së, Agron Mustafa, i cili po akuzohet për lidhje të kontratës së dëmshme për rastin “PAYKOS”, është ndërprerë. Gjykata do ftojë grupin e ekspertëve që e kanë përpiluar ekspertizën financiare e 31 majit 2022.
Në seancën e kaluar, gjykatësi Sabit Sadikaj kishte obliguar palën e dëmtuar, në këtë rast Telekomin e Kosovës, që ta dorëzojë në gjykatë një kopje të një vendimi të Tribunalit të Arbitrazhit të Zvicrës, ashtu që i njëjti t’iu dorëzohej palëve.
Ky vendim i Arbitrazhit, sipas mbrojtësit të të akuzuarit Mustafa, avokatit Driton Muharremi, ka ndërruar gjendjen faktike për 95%.
Ndërkaq, në seancën e sotme, pasi palët deklaruan se e kanë pranuar atë vendim, andaj avokati Muharremi propozoi që ky vendim të pranohej si provë, raporton “Betimi për Drejtësi”.
Avokati tha se edhe pas analizimit të atij vendimi, mbrojtja mban qëndrimin e njëjtë, se i akuzuari Mustafa nuk ka bërë lidhje të kontratës së dëmshme.
Kundër këtij propozimi ishte prokurorja Ardiana Veseli, por jo edhe përfaqësuesit e palës së dëmtuar, Sanije Sahiti dhe Durim Ahmetaj.
Ndërkaq, avokati Muharremi propozoi të caktohet një ekspertizë e re nga një grup prej tre ekspertëve të pavarur.
Ky propozim u kundërshtua nga prokurorja Veseli dhe nga pala e dëmtuar, të cilët thanë se në këtë rast veçse ekziston një super-ekspertizë, e për të cilën avokati Muharremi tha se është bërë në kundërshtim me ligjin në Kosovë.
Lidhur me këtë, gjykatësi Sadikaj tha se në këtë fazë gjykata e refuzon propozimin.
Mirëpo, tha se të gjitha shkresat e lëndës, përfshirë tani edhe provën (vendimin e Arbitrazhit) do t’i ofrohen grupit të ekspertëve të cilët e kanë hartuar ekspertizën më 31 maj 2022.
Po ashtu, ai tha se njëri nga anëtarët e grupit do të ftohet edhe në gjykatë për të dhënë mendimin e tij si ekspert dhe se më pas palët do të kenë të drejtë edhe për propozime të tjera.
Gjykata Themelore në Prishtinë përmes vendimit të marrë më 5 mars 2024 e kishte konfirmuar aktakuzën ndaj Mustafës për rastin “PAYKOS”, e që dëmi i pretenduar ndaj Telekomit thuhet të jetë afër 7 milionë euro.
Kurse, Gjykata e Apelit më 14 gusht 2024 e ka refuzuar ankesën e paraqitur nga Mustafa, duke konfirmuar aktakuzën për lidhje të kontratës së dëmshme.
Ndryshe, për këtë çështje penale Themelorja më 9 janar 2024 ka mbajtur seancën fillestare, në të cilën i pandehuri Mustafa ishte deklaruar i pafajshëm për veprën penale për të cilën akuzohet.
Sipas aktakuzës së ngritur nga Prokuroria Themelore në Prishtinë, e cila rezulton të jetë përpiluar më 3 maj 2023, i akuzuari Mustafa në cilësinë e kryeshefit ekzekutiv të Telekomit të Kosovës SH.A në Prishtinë, më 16 mars 2015 e në vazhdimësi me dije ka vepruar në dëm të PTK-së, ashtu që fillimisht ka lidhur kontratë – marrëveshje me Paykos L.L.C ku operatori ekonomik luan rolin e ndërmjetësuesit/distributorit të shitjes tek pala e tretë për shitjen e produkteve kryesisht mbushje elektronike dhe kode të gjeneruara elektronike për kartela gërvishtëse, çmimet e produkteve dhe shërbimeve kanë përfshirë edhe TVSH-në, ku provizioni total i shitjes ishte 9.7% të transaksionit.
Tutje, akti akuzues thotë se i akuzuari Mustafa me dashje dhe me qëllim që t’i shkaktojë dëm material Ndërmarrjes Publike “Telekomi i Kosovës”, ka nënshkruar vazhdimisht ankese shtesë ku secili lloj i provizionit që do të paguhet ndaj operatorit ekonomik i është shtuar përqindja në TVSH, duke e favorizuar kështu Paykosin në njërën anë e në anën tjetër e ka dëmtuar Telekomin e Kosovës.
Sipas akuzës, të dëmshme janë vlerësuar Aneksi II, III, V dhe VI, Memorandumi i vitit 2016 dhe Marrëveshja komerciale-bashkëpunimi-ofrimin e shërbimeve për lojë shpërblyese.
Me lidhjen e këtyre ankeseve-marrëveshjeve, akuza thotë se i akuzuari Mustafa me dije ka vepruar në dëm të ndërmarrjes që vazhdimisht i ka ndryshuar kushtet e kontratës në disfavor të ndërmarrjes që ka përfaqësuar, në vend që t’i mbrojë interesat e saj, ashtu që i njëjti me dashje i ka shkaktuar dëm në shkallë të madhe Telekomit të Kosovës, dhe atë në vlerë prej 6 milionë e 796 mijë e 732 euro.
Me këto veprime, Mustafa akuzohet se ka kryer veprën penale “Lidhja e kontratës së dëmshme”, nga neni 291, paragrafi 2 lidhur me paragrafin 1, dhe lidhur me nenin 81, paragrafi 1, nënparagrafi 1.2 dhe 1.5 të KPRK-së.
Ndryshe, Mustafa ngarkohej edhe në një rast tjetër, për të cilin në dhjetor të vitit 2022, Gjykata e Apelit e ka vërtetuar aktgjykimin e shkallës së parë, e cila më 21 shtator 2021, kishte shpallur aktgjykim lirues ndaj tij dhe dy ish-drejtuesve tjerë të Postës dhe Telekomit të Kosovës (PTK), Ejup Qerimi dhe Rexhë Gjonbalaj, të akuzuar për korrupsion.
