Deputetja Ariana Musliu-Shoshi, ka thënë se PDK do t’i fitojë zgjedhjet e 9 shkurtit.

Ajo në një intervistë për Gazeta Blic, ka thënë se qytetarët janë ata që e kanë përjetuar qeverisjen e Kurtit dhe ata do t’ia japin ndëshkimin.

“Qytetarët janë ata që e ndiejnë më së miri qeverisjen e z.Kurti dhe janë ata që do ta japin verdiktin e fundit të kësaj qeverie. Nuk ka as edhe dy vendime që unë të mund t’i numëroj si sukses i kësaj qeverie, marrë parasysh faktin se kemi regres edhe në ekonomi, edhe në miqësi me aleatët tanë, kemi dështim në politikën e jashtme, pra nuk ka as edhe një lëvizje apo vendim pozitiv që ka përjetuar shteti ynë që kjo qeveri ta meritojë edhe një mandat, andaj vlerësoj se qytetarët do të jenë ata të cilët do ta japin ndëshkimin e fundit për të gjitha këto dështime të kësaj qeverie në raport me zhvillimin e vendit”, shprehet ajo.

Ajo thekson se programi i PDK-së është për çdo fushë për të gjithë qytetarët.

“Si PDK jemi në vazhdimësi në takime me strukturat tona, jemi të organizuar që të jemi para qytetarëve tanë me një program final në të cilin do të trajtojmë të gjitha çështjet e politikës së brendshme. po ashtu edhe në shëndetësi, arsim e të gjitha fushat tjera. E po ashtu edhe në politikën e jashtme dhe shumë çështje tjera që jemi duke i trajtuar dhe i kemi pjesë të programit tonë”, potencon Musliu-Shoshi për Gazeta Blic.

Sa i përket koalicioneve të mundshme, deputetja thotë se PDK hyn në zgjedhje për të fituar.

“PDK do të jetë fituese e këtyre zgjedhjeve. Nuk hyjmë në zgjedhje me mendimin për të hyrë në koalicione në zgjedhje. Të shohim njëherë rezultatin nga zgjedhjet e datës 9 shkurt dhe pastaj sigurisht që ne kemi organe brenda partisë me të cilat diskutojmë dhe patjetër që merren vendime ashtu siç vlerësohet se është në të mirë të vendit tonë”, deklaron deputetja e PDK-së, Ariana Musliu-Shoshi./Gazeta Blic/